Pas raportimeve në media se Christian Panucci është zgjedhur trajner i ri i Kombëtares, ka reaguar edhe Federata Shqiptare e Futbollit me anë të një njoftimi për shtyp.
“FSHF kërkon të bëjë me dije opinionin publik që vazhdon intensivisht negociatat për trajnerin e ardhshëm të ekipit Kombëtar të Futbollit. Asgjë për momentin nuk është zyrtarizuar apo konfirmuar, teksa presidenti Duka vijon negociatat e tij me kandidatet përkatës për trajnerin e skuadrës përfaqësuese”, tha zyra për shtypin e Federatës.
Por, FSHF tha se trajneri i ri do të konfirmohet zyrtarisht në orët në vijim.
Megjithëse në njoftim nuk u përmenden emra, Panucci është një ndër kandidatët më të fortë për të zëvendësuar De Biasin në stolin e Kombëtares. Një tjetër kandidat i fortë është edhe italiani Luixhi De Kanio.
“Nëpërmjet kanaleve tona të komunikimit në orët ne vazhdim do te behet publike çdo gjë.”
44-vjeçari ka një karrierë shumë të suksesshme si futbollist gjatë viteve 1990-2010, kur mes të tjerave ka luajtur me Milanin, Real Madridin, Interin dhe Romën.
Ndërsa gjatë karrierës së tij si trajner, Panucci ka shërbyer si zv/trajner i Rusisë, trajner i Livornos dhe Ternanas.
a.ç