Autoritetet e Luksemburgut kanë nisur hetimet pasi disa dronë u panë në hapësirën ajrore pranë aeroportit kryesor të vendit, duke detyruar autoritetet të pezullojnë përkohësisht trafikun ajror gjatë natës.
Frieden deklaroi se gjatë ditëve të fundit është vërejtur prania e “dronëve ndoshta më të mëdhenj” në hapësirën ajrore të vendit, por theksoi se është ende herët për të përcaktuar origjinën e tyre.
Trafiku ajror në aeroportin e Luksemburgut u ndërpre për një periudhë të shkurtër gjatë natës, pasi dronët u konstatuan duke fluturuar pa autorizim brenda perimetrit të aeroportit. Autoritetet e cilësuan pezullimin si një masë paraprake për garantimin e sigurisë së pasagjerëve, ekuipazheve, stafit të aeroportit dhe avionëve.
Sipas kompanisë kombëtare ajrore Luxair, më shumë se 1,800 pasagjerë u prekën nga ndërprerja e trafikut, ndërsa 17 fluturime u devijuan drejt aeroporteve të tjera, përfshirë ato të Brukselit, Parisit dhe Frankfurtit.
“Kjo është diçka e re për Luksemburgun, por jo krejtësisht e pashembullt për vendet tona fqinje”, tha Frieden pas një takimi urgjent me ministrat e Mbrojtjes dhe të Brendshëm të vendit.
Incidenti vjen në një periudhë kur vendet evropiane kanë ngritur shqetësime për aktivitetet hibride të lidhura me Moskën, pas pushtimit të Ukrainës nga Rusia në vitin 2022. Në raste të mëparshme janë raportuar fluturime me dronë pranë instalimeve të ndjeshme, shkelje të hapësirës ajrore dhe sulme kibernetike.
Vitin e kaluar, dronë u panë mbi zona të ndjeshme në Belgjikë dhe Danimarkë. Ndërsa këtë vit, një dron që mbante eksplozivë u raportua në një aeroport gjerman, për incidentin e të cilit Berlini ka fajësuar Rusinë.
