Krimi ka filluar me llastiqe si një rrugaç i vogël, vijoji me biznesmenë, kaloi në parlament dhe tani do të shkojë deri tek liderët. Ky ishte paralajmërimi i profesorit Ylli Pango i cilli solli në vëmendje apelin e tij të dikurshëm ndaj Fatos Nanos dhe Sali Berishës. Ky shembull u soll në studion e emisionit “Java në RTSH”, teksa Pango, autor i librit “Psikologji Shqiptare”, shpjegoi sesa agresivë janë shqiptarët.
Në panel me analistët Preç Zogaj dhe Lorenc Vangjeli, Pango tha se kjo ndodh pasi krimi mori një progresivitet dhe se ligjet për ta luftuar atë kryesisht në politikë u miratuan tepër vonë. Ai tha se para ligjit të dekriminalizimit, krimi kishte depërtuar rëndshëm në parlament, pothuajse në çdo legjislaturë.
Ai tha se ngjarjet e rënda dhe kronika e zezë po sjellin modele të gabuara për shqiptarët. Megjithatë, sipas Pangos, ndikim në agresivitet ka edhe temperamenti mesdhetar duke kujtuar këtu fqinjët tanë grekë, apo italianët e jugut.
Në studion e emisionit “Java në RTSH”, Pango ushqeu edhe polemikat rreth besimeve fetare dhe ndikimit të tyre në shoqëri.
Ai tha se fetë në vendin tonë nuk kanë rrenjë dhe se ka munguar historikisht edukimi teologjik në vend.
I pyetur për bashkëjetesën e tre feve kryesore, Pango tha:
“Ne nuk kemi pasur besim fetar me rrënjë të thella në Shqipëri. Kjo ka bërë që toleranca fetare të jetë shumë më e lehtë” – tha Ylli Pango.
Autori i librit “Psikologji Shqiptare” tha se besimet fetare nuk kanë qenë bazale pasi ata që janë konvertuar në myslimanë gjatë pushtimit osman, e kanë bërë këtë për interesa pragmatiste.
“Besimi fetar në përgjithësi për 40 vite u godit. Këtu shtojmë edhe faktin se nuk ka pasur shkollim fetar në asnjë periudhë. Gjithashtu në qindra apo mijëra xhami ka shumë njerëz që falen sot. Ky është fakt” – tha Pango mbrëmjen e së premtes.
https://www.youtube.com/watch?v=2Gtlkf8qrPk
