Pandemia po ndikon në rritjen e agresivitetit tek drejtuesit e mjeteve në rrugë duke rezultuar fatale për jetën e qytetareve.
Për drejtuesit e policisë COVID-19 ka shkaktuar çrregullime të sjelljes së shoferëve, e cila është reflektuar tek parakalimet e gabuara, shpejtësia tej normave të lejuara.
“Kohët e fundit ka një sjellje të çuditshme të drejtuesve të mjeteve aq sa konfrontohen me punonjësit e policisë, nuk i mirëkuptojnë për masat administrative ose shkeljen e kryer, nuk e kuptojnë veprimin që bëjnë. Ndoshta duhet parë edhe pandemia ku mund të ketë një ndikim në sjelljet e tyre në rrugë”, tha Skënder Ismaili, shef i sektorit të sigurisë rrugore.
Sipas tij, një nga rregullat e qarkullimit që është shkelur më së shumti, ka qenë drejtimi i mjetit pa patentë dhe nën efektin e alkoolit.
“Gjatë këtyre muajve ne kemi raste skandaloze, janë 384 raste të drejtimit të mjeteve në gjendje të dehur dhe pa leje drejtimi”, u shpreh Ismaili.
Ismaili thotë se nuk kanë munguar ndëshkimet, dhe në disa raste përfundojnë dhe me arrestimin e drejtuesve të mjeteve.
“Policia në krahasim me vitet e kaluara i ka trefishuar sanksionet administrative për sigurinë rrugore”, tha ai.
Ndërkohë gjatë 24 orëve të fundit janë ndëshkuar 1300 shoferë për shkelje të ndryshme si dhe janë pezulluar 19 leje drejtimi. Deri tani në muajin Mars rezultojnë të jenë vendosur 14.407 masa administrative.
