Ministrja e Shëndetësisë, Ogerta Manastirliu gjatë një konference me ambasadorin e Bashkimit Europian, Luigi Soreca, pas marrjes së një tjetër ndihme për përballimin e situatës së koronavisit, tha se sfidat me të cilat po përballet vendi janë të mëdha.
“Sot janë 6 muaj nga dita e parë e rastit të parë të konfirmuar në Shqipëri me covid, janë 6 muaj pune të qeverisë, 6 muaj lufte në vijën e parë të frontit të mjekëve infermierëve në spitalet tona. 6 muaj pune urgjencës, epidemiologeve. 6 muaj pune e mjekëve dhe infermierëve që falë punës së tyre ne po përballojmë këtë pandemi që ka vështirësitë e saj dhe që sistemi ynë, falë edhe kontributit të bashkëpunëtorëve tanë ia kemi dalë ta menaxhojmë mëse miri. Ne përballemi me sfida të mëdha”, u shpreh Manastirliu.
Ministrja shtoi se ka kaluar një periudhë 6 mujore, por ajo që na pret është një periudhë e cila do të na përballë me shumë sfida.
Ajo deklaroi se sapo kemi hyrë në një sezon vjeshtë dimër, ku është hartuar një strategji ku fokusi kryesor është fuqizimi i kapaciteteve, duke nisur me testimin, gjurmimin.
“Duke vijuar me të gjithë administrimin e rasteve të ndjekura nga mjekët e familjes. Ne kemi ndërtuar të gjithë skenarët e mundshme, për t’iu përgjigjur edhe flukseve në rritje të rasteve gjatë vjeshtës dhe dimrit. Vjeshta do të na përballë me gripin e stinës. Sapo të vijnë vaksinat do të fillojmë vaksinimin, duke e siguruar falas për grupet në risk”, u shpreh Manastirliu.
/a.r
