Me vënien nën kontroll të shpërthimeve të COVID-19 dhe hyrjen në fuqi të politikave pro rritjes, Kina po bën përpjekje të shumëfishta për të vazhduar prirjen e rimëkëmbjes në gjysmën e dytë të këtij viti.
Ekonomia kineze ka qenë nën trysni nga rigjallërimi i epidemisë dhe konfliktet gjeopolitike globale që nga marsi. Për të ndihmuar në kapërcimin e këtyre vështirësive, politikëbërësit e vendit kanë ndërmarrë lëvizje të shumta mbështetëse, duke filluar nga forcimi i subjekteve të tregut te nxitja e kërkesës së brendshme.
Falë këtyre përpjekjeve, të dhënat më të fundit kanë dëshmuar një rritje të treguesve kryesorë. Për shembull, treguesi i menaxherëve të blerjes për sektorin e prodhimit të Kinës, i cili mat aktivitetin e fabrikave të vendit, arriti në 50.2 në qershor, duke u rikthyer në zonën e rritjes.
Funksionimi i ekonomisë kineze ka pasur një “udhëtim” të pazakontë që nga fillimi i këtij viti, tha kryeministri Li Keqiang në një simpozium këtë javë. Në përgjithësi, ekonomia ka një rimëkëmbje të fituar të vështirë bazuar në zbatimin e një sërë politikash për stabilizimin e saj, shtoi ai.
Kryeministri theksoi gjithashtu se bazat e rimëkëmbjes janë ende të paqëndrueshme dhe bëri thirrje për shtimin e përpjekjeve lidhur me stabilizimin e ekonomisë.
Duke shpallur përparësitë për punën ekonomike në mes të vitit, Li vuri në dukje se 160 milionë subjektet e tregut të Kinës janë burimi i qëndrueshmërisë ekonomike dhe kanë rëndësi jetike për punësimin dhe funksionimin e përgjithshëm të ekonomisë kombëtare. Ai bëri thirrje për më shumë masa për të rigjallëruar subjektet e tregut, veçanërisht mikrondërmarrjet, ndërmarrjet e vogla e të mesme dhe individët e vetëpunësuar.
Për të mbështetur më tej subjektet e tregut në Kinë, është zgjeruar kohët e fundit mbulimi me rimbursim të TVSh-së për kompanitë në shtatë sektorë të tjerë, duke përfshirë shitjet me shumicë dhe pakicë, bujqësinë, hotelerinë dhe ofrimin e ushqimeve. Kjo do ta çojë shumën e përgjithshme të rimbursimit dhe të uljes së taksave në 2.64 trilionë juanë (rreth 393 miliardë dollarë amerikanë) këtë vit.
Si pjesë e përpjekjeve për të nxitur kërkesën e brendshme, Ou Hong, zyrtar i Komisionit Kombëtar të Zhvillimit dhe Reformës, tha në një konferencë të fundit shtypi se do t’u jepen përparësi projekteve të tilla si ruajtja dhe administrimi i ujit e transporti, si edhe zbatimit të politikave që synojnë nxitjen e konsumit të automjeteve dhe të pajisjeve elektroshtëpiake.
Në kushtet e nxitjes së infrastrukturës, po u caktohen paraprakisht bono të posaçme organeve të qeverisjes vendore për të nxitur investimet në ndërtimin e infrastrukturës. Deri në fund të majit, mbi 2 trilionë juanë bono të tilla janë emetuar në mbarë vendin, duke zënë 59 për qind të kuotës së këtij viti.
Lëvizja e re në këtë drejtim ishte në fillim të kësaj jave, kur banka qendrore njoftoi se do të mbështesë dy banka politikash për të mbledhur deri në 300 miliardë juanë nëpërmjet nxjerrjes së bonove financiare për të financuar projektet kryesore të vendit.
