Ministri i Bujqësisë, Zhvillimit Rural dhe Administrimit të Ujërave, Edmond Panariti, ne kuadër të vizitës së tij qe po zhvillon në SHBA, vizitoi ditën e diel tregun e prodhimeve bujqësore kryesisht organike në Washington, ku pa dhe u njoh nga afër me organizimin e këtij tregu.
Duke u nisur nga bisedat me fermerët amerikanë, ministri Panariti vlerësoi mënyrën e organizimit të këtij tregu dhe rëndësinë e këtyre prodhimeve organike duke përditësuar këtë shembull edhe në Shqipëri. Zhvillimi i prodhimit organik i gërshetuar me ofertën agro-turistike, është një nga drejtimet kryesore për bujqësinë shqiptare.
Në këtë kuadër dikasteri i Bujqësisë do të nisë organizimin e tregjeve për këto lloje prodhimesh, për të inkurajuar fermerët drejt prodhimit organik, një prodhim me shumë perspektivë, i vlerësuar në tregjet ndërkombëtare.
Gjithashtu, Ministri Panariti priti në takim ish-kongresmenin, Mike Sodrel, ku vlerësoi interesimin e tij në mbështetjen dhe zhvillimin e bujqësisë shqiptare.
Panariti e informoi për politikat e ndërmarra nga dikasteri që drejton dhe për projektet të cilat do t’i adresohen në ditët në vijim, në takimet e planifikuara në Departamentin e Shtetit. Nga ana e tij, ish-kongresmeni Sodrel ka shprehur dëshirën për të vizituar Shqipërinë dhe për të parë nga afër mundësinë që ofron sektori bujqësor si një nga sektorët prioritarë në zhvillimin ekonomik të vendit.
Një nga prioritetet, e axhendës së vizitës së kreut te Bujqësisë shqiptare ne SHBA, është ngritja e një laboratori analizash bashkëkohor, që do të plotësojë kërkesat në rritje të fermerëve për të kontrolluar prodhimet e tyre.
Në këtë kuadër, Ministri Panariti takoi zv/presidentin e kompanisë ‘’Abraxis’’, David Deardorff, një nga kompanitë më prestigjioze në fushën e kërkimit shkencor dhe analizave laboratorike të prodhimeve ushqimore.
Ministri kërkoi asistencën e kësaj kompanie dhe pajisjen me kitet për analizat e tipit “pre-screening’’, të cilat përbëjnë gjeneratën e fundit të zhvillimit teknologjik amerikan , në zbulimin e mënyrës sa më të shpejtë të ndotësve, pesticideve ose insekticideve në prodhimet me origjinë bujqësore dhe shtazore. Mbështetja logjistike e kësaj kompanie, në ngritje të një sistemi laboratorik analizash në Shqipëri, do të jetë një garanci e shtuar për nxitjen e eksporteve./atsh/.a.k
