Grupi i parë i emigrantëve klandestinë, që konsiderohen me rrezik të lartë nga autoritetet amerikane, kanë mbërritur në burgun famëkeq të Guantanamos. Këtë e konfirmon Departamenti i Mbrojtjes në Shtetet e Bashkuara.
“Agjencia për Emigracionin po zbaton këtë masë për të garantuar ndalimin e sigurtë për këta individë, derisa të bëhet transferimi i tyre për në vendet e origjinës apo në një destinacion tjetër të përshtatshëm”, lexohet në një deklaratë të shpërndarë nga Departamenti, duke saktësuar se bëhet fjalë për një masë të përkohshme. Imazhet e publikuara shfaqin emigrantët e prangosur teksa futen në një avion ushtarak.
Administrata e presidentit amerikan, Donald Trump, synon që të transferojë dhjetëra mijëra emigrantë të paligjshëm, që konsiderohen me rrezikshmëri të lartë, për në bazën detare në Kuba, të shndërruar në një burg.
Më herët, Sekretari i Shtetit, Marco Rubio, arriti një marrëveshje me liderin e El Salvadorit për transferimin e emigrantëve të paligjshëm, por edhe të të burgosurve. Departamenti i Shtetit njoftoi edhe një marrëveshje tjetër, këtë herë me Panamanë për heqjen e çdo tarife për kalimin e anijeve amerikane në Kanalin e Panamasë. Megjithatë gjërat duket se nuk janë kështu. Panamaja ka reaguar duke mohuar ndryshimet në fjalë për të lejuar anijet e qeverisë së SHBA për të kaluar në Kanal pa pagesë.
