David Cameron pagoi 76 mijë stërlina taksa, për të ardhurat prej më shumë se 200 mijë stërlinash në vitet 2014-2015. Këto të dhëna vijnë pasi kryeministri britanik publikoi të ardhurat e tij, në një lëvizje të paprecedentë nga krerë të qeverisë në ishull.
Në dokumente shihet qartë se, ai fitoi 47 mijë stërlina të ardhura nga qiraja e shtëpisë në Londër dhe se, mori 300 mijë stërlina trashëgimi, kur babai i tij ndërroi jetë në vitin 2010. Një vit më vonë, Cameron mori dy pagesa prej 100 mijë stërlinash nga nëna e tij, për të balancuar trashëgiminë mes tij dhe vëllezërve e motrave të tij.
Në dokumente shfaqen gjithashtu edhe fitimet apo taksimet nga aktivitetet e bashkëshortes së tij. Cameron, i cili lajmëroi më herët krijimin e një “task force” të re për të hetuar akuzat për shmangie taksash, tha se i publikoi të ardhurat e tij për të qenë plotësisht i hapur dhe transparent, si dhe për të eliminuar çdo dyshim që është ngritur kundër tij.
Prej ditësh, debati vazhdonte shumë i ndezur në Britani, nëse kryeministri kishte përfituar apo jo nga një firmë jashtë vendit, e krijuar nga babai i tij, dhe shumë protestues kërkuan që ai të tregojë të ardhurat për të sqaruar situatën.
Mediat shkruajnë se, tashmë Cameron shpreson që të ketë kënaqur ata që mendonin se ai kishte diçka për të fshehur. Ekspertët thonë se, në dokumentet e publikuara nuk ka as edhe një të dhënë, që të tregojë se ai ka shmangur taksat, por aty shfaqet pasuria e tij dhe kundërshtarët shpresojnë që ta përdorin politikisht.
Por, ndërsa laburistët thonë ende se kryeministri nuk është aq transparent sa ç’duhet, disa politikanë konservatorë shqetësohen se ai ka treguar më shumë sesa duhet. Tashmë mund të shtohet presioni mbi ministrat e kabinetit që të tregojnë të ardhurat e tyre, si dhe është ngritur shqetësimi se, nëse taksat nuk mbeten çështje private, njerëzit e suksesshëm nuk do të bëhen më pjesë e politikës. TCh
