Panairi i punës dhe studimit “Work&Study”, organizuar nga Dhoma e Tregtisë dhe Industrisë Tiranë në bashkëpunim me Ministrinë e Arsimit dhe Sportit dhe atë të Mirëqenies Sociale dhe Rinisë, u çel të mërkurën, në ambientet e Muzeut Historik Kombëtar në Tiranë.
Në ceremoninë e hapjes merrnin pjesë ministri i Mirëqenies Sociale dhe Rinisë, Blendi Klosi, zv.ministrja e Arsimit Nora Malaj, personalitete nga institucionet e linjës, fusha e biznesit dhe bota akademike. Ministri Klosi, në përshëndetjen e mbajtur me këtë rast tha se “arsimi profesional është rruga drejt tregut të punës”.
Ky aktivitet, u shpreh ministri Klosi, duhet inkurajuar dhe mbështetur me qëllim që, panairi i punës dhe studimit të jetë i hapur në të gjitha ditët e vitit. “Duhet të ketë teknika për ta mbajtur hapur këtë panair. Ne si ministri, duke kërkuar mbështetjen e biznesit dhe të institucioneve të arsimit profesional, duhet të kemi mundësi që zyrat tona rajonale të punës të jenë jo vetëm zyra që presin shqetësimin e të papunëve, por edhe të orientojnë arsimin profesional dhe tregun e punës”, tha ministri Klosi.
“Qeveria do të ndërmarrë reforma për nxitjen e punësimit në vend dhe në këtë kuadër, Ministria e Mirëqenies Sociale shumë shpejtë do të paraqesë në Parlament një paketë të plotë me tre ligje për të rregulluar arsimin profesional dhe tregun e punës”, u shpreh ministri Klosi.
Një nga këto tre ligje, sipas Klosit, është ai “Për arsimin profesional” për të pasur mundësi që të rregullojmë me ligj raportet ndërmjet arsimit profesional dhe si lidhet ai me tregun e punës. Gjithashtu do të paraqesim ligjin “e zejeve”, që do të jetë një ligj kryekëput për ata zanatçinj që jetojnë me punë të denjë, në mënyrë që të kenë mundësinë që nëpërmjet punës së denjë të krijojnë karrierën dhe bizneset e tyre dhe të hapin vende të reja pune. “Dhe ligji i tretë po aq i rëndësishëm është ligji i nxitjes së punësimit”, theksoi ai.
“Kjo paketë do të vijë në bashkëpunim me kontributin e institucioneve qeveritare, institucioneve të arsimit profesional dhe tregut të punës apo komunitetit të biznesit”, tha ministri Klosi.
Ndërsa zv.ministrja e Arsimit, Malaj, duke folur për vëmendjen e madhe që po i kushtohet arsimit dhe në veçanti arsimit profesional në vendin tonë, si faktor kyç për punësimin tha se “panairi i punës vjen në këtë edicion me një qasje të re të interesave të biznesit në raport me investimet e kryera në arsim”. Miratimi i ligjit për arsimin, do të çelë një rrugë të re në reformën e sistemit arsimor, që në partneritet me ministritë e linjës, dhomat e biznesit dhe sipërmarrjen do të kenë në kryefjalë të tyre, punësimin.
Në këtë panair marrin pjesë më shumë se 40 kompani të mëdha, agjenci punësimi dhe universitete private. Studentët, por edhe të rinjtë do të kenë mundësi të kontaktojnë me kompanitë më të njohura për të pasur një mundësi për t’u punësuar.
Panairi u krijon kushte studentëve, që gjatë kohës së studimit të punojnë me orar të pjesshëm, duke i përballuar vetë shpenzimet e studimeve
