Një zjarr i madh ka shpërthyer në pyjet pranë Marsejës, në Francën jugore, duke shkaktuar alarm tek autoritetet lokale, ndërsa flakët, të nxitura nga erërat e forta, lëvizin drejt qytetit.
Erërat e forta po arrijnë shpejtësinë 70 kilometra në orë, duke e bërë të vështirë shuarjen dhe duke përshpejtuar përhapjen e frontit të zjarrit.
Zjarri shpërtheu pranë qytetit Les Pens-Mirambeau, në veri të Marsejës, dhe po shkon drejt periferive perëndimore të qytetit. Zonat e 15-të dhe të 16-të të Marsejës janë vënë tashmë në gatishmëri, me autoritetet që u bëjnë thirrje banorëve të qëndrojnë brenda shtëpive të tyre, të mbyllin dyert dhe dritaret dhe të shmangin çdo lëvizje, në mënyrë që të mos pengojnë kalimin e automjeteve të zjarrfikësve dhe të shpëtimit.
Qyteti ka pezulluar operacionet në aeroport, ndërsa shërbimet e emergjencës janë në gatishmëri për një urdhër të mundshëm evakuimi. Në të njëjtën kohë, sipas BFMTV, trafiku i trenave pranë stacionit Marseille-Saint-Charles është pezulluar gjithashtu pjesërisht në të dyja drejtimet, me zjarrin që ka arritur pranë shinave.
Në të njëjtën kohë, kryetari i bashkisë së Marsejës, Benoit Payan, u kërkoi banorëve të jenë “jashtëzakonisht të kujdesshëm dhe të kufizojnë lëvizjet e tyre sa më shumë që të jetë e mundur, në mënyrë që të ketë hapësirë për shërbimet e emergjencës, veçanërisht në pjesën veriore të qytetit”.
Kryebashkiaku i Marsejës theksoi se më shumë se 700 zjarrfikës po operojnë në zonë, me 220 automjete.
INCENDIE CATACLYSMIQUE À MARSEILLE ! Des flammes dévorent les quartiers nord, menaçant des milliers de vies. ️ Le feu, parti d'un véhicule sur l'autoroute près du tunnel des Quatre-Vents, s'est propagé à une vitesse folle, ravageant des dizaines d'hectares sous l'effet… pic.twitter.com/ZdfQYDefsQ
— IntroSpecNews (@introspecnews) July 8, 2025
Tymi i dendur është tashmë i dukshëm në qytet, me atmosferën që po bëhet mbytëse në qendër të Marsejës, ku regjistrohet një erë e fortë djegieje.
“Na u urdhërua të qëndronim brenda, me anë të një mesazhi që morëm në celularin tonë. Po presim udhëzime të mëtejshme”, tha Jacqueline Revilla, një banore e zonës.
“Shumë nga fqinjët tanë janë larguar tashmë, ne do të qëndrojmë nëse zjarrfikësit nuk na thonë ndryshe”, tha Monique Bayard nga Le Pen-Mirabeau. Rajoni Provence-Alpes-Côte d’Azur postoi në platformën ‘X’ se “në këtë fazë, qytetarëve u kërkohet të qëndrojnë në shtëpitë e tyre dhe të mos jenë në rrugë”.
