Partia Demokratike jo vetëm ka pësuar një humbje të thellë në zgjedhjet vendore të 21 Qershorit, por e gjithë kupola drejtuese e saj, me shumë pak përjashtime konsiderohet humbëse.
Të vetmit që mes emrave të strukturave drejtuese të Partisë Demokratike mund të merren si model brenda rradhëve të demokratëve janë Aldo Bumci, i deleguar në Lezhë, Flamur Noka, i deleguar në Kukës, Bashkim Shehu i cili fitoi garën për Bashkinë e Kukësit dhe Voltana Ademi, e cila u zgjodh kryebashkiake e Shkodrës.
Drejtuesit e tjerë të kësaj partie, qofshin drejtues departamentesh, anëtarë kryesie të PD-së apo kryesie të Grupit Parlamentar, kanë korrur në 21 Qershor humbje, madje ndër më të thellat kjo parti ka pësuar ndonjëherë.
Nënkryetarët e PD-së Edmond Spaho dhe Edi Paloka rezultojnë humbës në Durrës dhe Tiranë, ku drejtonin grupet e punës apo ishin pjesëtarë të grupeve të punës në fushatë. Gjithashtu Jorida Tabaku rezulton humbëse në Tiranë.
Sekretari Organizativ Enno Bozdo gjithashtu i angazhuar kryesisht për zgjedhjet në Tiranë, rezulton humbës.
Gjithashtu Eduard Halimi dhe Oerd Bylykbashi të deleguar në Durrës dhe Kavajë rezultojnë humbës nga rezultatet e arritura nga PD.
Grida Duma, Sekretare për Marrëdhëniet me Publikun, humbi thellë garën për kryebashkiake në Durrës përballë Vangjush Dakos.
Sekretari i Përgjithshëm Arben Ristani i siguroi PD një nga humbjet më të thella në Vlorë, ku kandidati për Kryetar Bashkie Genci Deromemaj humbi me mbi 25 mijë vota përballë kandidatit të ASHE.
Sherefedin Shehu dhe Tritan Shehu, drejtues departamentesh në PD, gjithashtu rezultojnë humbës nga rezultatet e marra në Dibër dhe Gjirokastër.
Ridvan Bode, i deleguar në Elbasan, gjithashtu rezulton humbës.
Dhe në fund, Lulzim Basha, kryetar i PD-së, i angazhuar në fushatën e opozitës në të gjithë vendin, arriti t’i sigurojë partisë më të madhe opozitare rezultatin më të ulët zgjedhor, megjithëse në deklarimin e tij të parë pas zgjedhjeve, e konsideroi atë një hap të madh përpara.
Referuar rezultateve tashmë të zyrtarizuara, nga e gjithë kupola drejtuese e PD-së, ku renditen rreth 50 emra, vetëm 4 ose 5 prej tyre, mundën të marrin rezultate pozitive në bashkitë ku ishin deleguar. /Tema/
