Deputeti i Partisë Demokratike, Edi Paloka në fjalën e tij para protestuesve në tubimin që po zhvillohet para Kryesisë së Kuvendit, u ka kërkuar shqiptarëve të bashkohen për të rrëzuar regjimin e Edi Ramës.
Duke e krahasuar kryeministrin me ish-diktatorin Enver Hoxha, ai tha se diktatura sapo ka nisur të ngulë rrënjë sërish në Shqipëri, pasi forca dhe represioni i qeverisë u ka hyrë qytetarëve në ccdo shtëpi.
“Kush do t’iu dal në krah nesër kur të vij t’ju shkatërroj pronat, t’ju marr dhe jetën. Çfarë po prisni? Nëse nuk e kuptoni që kjo që po ndodh nuk është kundër Sali Berishës, nuk është kundër 50 deputetëve të opozitës, nuk është thjesht kundër opozitës, po kundër gjithë shqiptarëve do të jetë vonë nesër. E keni parë ku janë ata që iu janë shkatërruar shtëpitë, ku janë studentët, presin që t’iu vëjë prapë shkelmin në fyt Edi Rama? Do prisni të gjithë që ky regjim të vijë në shtëpitë tuaja që pastaj të kuptoni se çfarë do të ndodhë.
As Enver Hoxha nuk e vendosi diktaturën, as për 1 ditë e as për një vit. Kështu e nisi, eliminoi në fillim opozitën, pastaj iu mori shqiptarëve pronat, besimin e pastaj jetën. Do ta lini që këtë ta bëjë një tiran i çmendur si Edi Rama. Kjo po ndodh, çdo ditë shkelen me këmbë e poshtërohen shqiptarët. Enveri kishte Aranit Çelën që dënonte, vriste burgoste, pushkatonte me ligj. Edi Rama sot përdor SPAK-un si Enveri dikur Aranit Çelën. Për të kthyer diktaturën në këtë vend.”
/f.s
