Kreu i grupit parlamentar demokrat, Edi Paloka, ka dalë sot në një konferencë për shtyp për të folur rreth procedimit të kandidatit të Vorës, Fiqiri Ismaili.
Paloka ka qenë i shoqëruar në transmetimin direkt edhe nga tre shtetas të tjerë, të cilët sipas tij janë denoncuesit e rastit të blerjes së votës. Kreu i grupit të PD tha se këta shtetas nuk kanë bërë denoncim, por janë marrë peng nga policia dhe janë detyruar që të bëjnë dëshmi të rreme.
“Mazhoranca Rama-Meta nuk po ndalet përpara asnjë akti kriminal në funkson të dhunimit të vullnetit të qytetarëve. Aktet efundit kur policia e shteti është vënë në shërbim të Metës dhe LSI-së tregon qartazi se kjo mazhorancë janë gati të çojnë demokracinë drejt shkatërrimit” – tha Paloka.
Ai akuzoi kreun e policisë së Vorës, i cili sipas Palokës është nga skrapari dhe po dhunon çdo ditë mbështetësit e opozitës që të mos mbështesin Fiqiri Ismaili.
“Ismailit iu bllokua malli dhe mjetet e punës nga ministri i LSI-së dhe nga dje po përpiqen t’i bllokojnë të gjithë biznesin” – tha Paloka, i cili konfirmoi se do të bëjnë padi penale ndaj kreut të policisë së Vorës, Bujar Laze.
