Partia Demokratike është e gatshme të të bashkojë votat me mazhorancën për ndryshime në Kushtetutë, vetëm në rast se reforma në drejtësi nuk do të përdoret si karrem për të kontrolluar sistemin.
Kështu është shprehur Kryetari i Grupit Parlamentar të PD, Edi Paloka në një intervistë për Ora News. Ai shprehet se 93 votat që kërkon ndërhyrja në Kushtetutë do të mund të arrihen vetëm falë dakordësisë së opozitës
“Vullneti ynë është absolut. Është shprehur, është konfirmuar për të bërë çdo ndryshim të nevojshëm qoftë dhe në Kushtetutë por ti shërbejë reformës në drejtësi jo ti shërbejë kapjes së drejtësisë nga kjo maxhorancë. Deri më sot nuk kemi gjë tjetër veçse kapje të institucionit të drejtësisë. Heqje e kompetencave të atyre që nuk janë në maxhorancë. Dhe duket që hapet e tjerë synojnë këtu. Nëse do të vazhdohet kështu sigurisht nuk mund të bashkojmë votat për një synim të tillë”, shprehet Paloka.
Edhe dekriminalizimi i parlamentit, pritet të sfidojë politikën në sesionin e ri parlamentar. Realizimi i procesit, sipas Palokës,mbështetet mbi të gjtha tek vullneti politik
“Kemi mungesë të plotë vullneti të paktën nga ana e Ramës lidhur me këtë çështje. Kjo nuk përjashton Metën dhe nëse ky vullnet mungon të jeni të bindur se asnjë ligj e asnjë reformë nuk e zgjidh këtë problem” tha ai
Paloka ndalet edhe në analizën e PD për zgjedhjet e 21 qershorit, duke deklaruar se ka shumë vend për reflektim dhe korrigjime, të të cilat pritet të shpalosen në shtator
