Ndryshime e reja fiskale për vitin 2019 parashikojnë dy procedura lehtësuese për biznesin, në rastet kur ankimojnë një vendim të administratës tatimore.
Drejtoria e Përgjithshme e Tatimeve, bën të ditur se, që prej fillimit të këtij viti, biznesi nuk do të paguajë më kamatëvonesat, në rast të një apelimi vendimi, por vetëm detyrimin, ndërsa gjoba do të ulet në 70 % të vlerës, në rast se subjekti pranon vlerësimin e përcaktuar nga tatimet.
Ndërkohë që kush do të përfitojë nga ulja e tatimit mbi dividendin në masën 8 %, për vitet para 2018, bizneset do të duhet ta paguajë atë brenda datës 30 shtator. Pas këtij afati ky tatim për vitet paraardhëse do të jetë 15%.
Paralelisht me këto ndryshime, në fuqi kanë hyrë edhe dy masa anti-evazion. Subjektet nuk mund të kalojnë në status pasiv, pa paguar më parë detyrimet, ndërsa një person fizik nuk mund të regjistrohet me disa NIPT-e duke ndarë aktivitetin e tij, bën të ditur Drejtoria e Përgjithshm e Tatimeve.
/a.rada
