Zbardhen të tjera detaje nga paketa fiskale e qeverisë. Shumë shpejt në Parlament do të shkojnë ndryshime për vitin 2020 dhe këtë herë qeveria do të zbatojë një skemë progresive sa i takon gjobave ndaj biznesit. Ndryshimet e parashikuara lidhen me gjobitjen e bizneseve, të cilët nuk janë të regjistruar si të tillë, por edhe për ata bizneset të cilët janë regjistruar, por nuk lëshojnë faturat shoqëruese, duke përfshirë këtu bizneset e mëdha dhe të vegjël.
“Për bizneset e vogla, që nuk janë të regjistruara në TVSH dhe që nuk lëshojnë fatura, ose i lëshojnë me elemente gjysmake sipas ndryshimeve të reja ligjore, dënohen me gjobë prej 50,000 lekë. Tatimpaguesit e regjistruar me përgjegjësinë tatimore të tatimit të thjeshtuar mbi fitimin për biznesin e vogël dhe për TVSH-në, dënohen me gjobë prej 100,000 lekë, por jo më pak se vlera e TVSH-së munguar.
Tatimpaguesit e regjistruar me përgjegjësinë tatimore të tatimit mbi fitimin dhe për TVSH-në, dënohen me gjobë prej 150,000 lekë, por jo më pak se vlera e TVSH së munguar”, thuhet në draft.
Gjoba progresive
Më tej në paketën fiskale theksohet se do të ketë gjobë progresive për ata biznese të cilët e përsërisin këtë shekeje për të dytën herë, duke arritur edhe në bllokim të aktivitetit deri në ditën që këto gjoba do paguhen. “Përveç dënimit me gjobë, sipas pikës 1 të këtij neni, përveç masës së gjobës për tatimpaguesit e regjistruar për TVSH-në bëhet vlerësim tatimor për tre muajt e fundit, duke përdorur metodat alternative. Sipas ndryshimeve të propozuara, subjekti, i cili për herë të dytë brenda vitit kalendarik, kryen një shkelje gjobitet me 100,000 lekë për tatimpaguesit e tatimit të thjeshtuar mbi fitimin e biznesit të vogël pa TVSH, 200 000 lekë për tatimpaguesit e tatimit të thjeshtuar mbi fitimin e biznesit të vogël me TVSH, 300 000 për tatimpaguesit e tjerë të regjistruar për tatimfitimi dhe TVSH. Për tatimpaguesit e regjistruar për TVSH-në bëhet vlerësim tatimor për periudhat e fundit të pavlerësuara, por jo më tepër se tre muaj, duke përdorur metodat alternative, të parashikuara në nenet 71 dhe 72 të këtij ligji. Më tej, ndaj biznesit merret masa e bllokimit të veprimtarisë në vendin ku është konstatuar shkelja për 30 ditë kalendarike, e cila hiqet nëse tatimpaguesi paguan penalitetet e vendosura”, sqarohet në draft.
Në ndryshim të penalitetit shikohen edhe ato raste kur një biznes që lëshon dëftesë tatimore me vlerë të paraqitur, ose edhe ato raste kur kjo dëftesë nuk është e plotë apo përdoret edhe jashtë institucionit të autorizuar. Sipas ndryshimeve të bëra në paketën fiskale, gjobat në këto raste fillojnë nga 10 mijë në 50 mijë lekë.“Ndryshimet përcaktojnë se tatimpaguesi që lëshon një dëftesë tatimore, me vlerë të parashtypur, që nuk përmban elementet e përcaktuara në këtë ligj dhe në aktet nënligjore, për dëftesën tatimore/biletën me vlerë të parashtypur, dënohet me gjobë, në masën 50 000. Tatimpaguesi që lëshon dëftesë tatimore, ku ka shënuar një vlerë të ndryshme nga vlera e furnizimit, ose e çmimit të afishuar, dënohet me gjobë në masën 50 000 lekë; moslëshim i biletave të shërbimit me vlerë të parashtypur, të prodhuara nga institucionet e autorizuara, të përdorura në sektorë të ndryshëm, dënohet me gjobë, në masën 10,000 lekë”, përcaktohet në paketën fiskale. Sipas ndryshimeve të bëra do të gjobitet edhe ai biznes i cili nuk instalon pajisjet e reja fiskale dhe nuk i mirëmban ato, pasi në shumë raste problematika në software krijojnë parregullsi në fatura.
/a.r
