Kryetarja e Komisionit Parlamentar të Sigurisë, Ermonela Felaj deklaroi sot se Akti Normativ ka fuqinë e ligjit dhe vë fokusin te masat parandaluese me karakter të përkohshëm që kanë të bëjnë personat e dënuar për krime të rënda, që janë në hetim brenda apo jashtë vendit për krime të rënda.
“Akti Normativ i shërben interesit të gjerë publik, sepse ajo ekonomi që vendoset në sajë të krimit dhe që duket se “lulëzon” nga paratë e krimi është sulmi më vdekjeprurës që mund t’i bëhet një ekonomie”, – deklaroi Felaj.
Akti Normativ, bëri të ditur Felaj, detyron të gjitha institucionet të vënë në dispozicion të gjitha të dhënat e kërkuara organit të policisë dhe prokurorisë në kohë maksimale. Po ashtu theksoi Felaj, detyron veprimin dhe dhënien përparësi të tilla kërkesave për Prokurorinë dhe Gjykatat.
“Do na sigurojë produkt. Po i japim krimit të kuptojë se ai nuk mund të jete kurrsesi një hap para shtetit. Shteti ka kapacitet t’i kundërvihet krimit. Gjëja që duhet të sigurojë shteti është vullneti, dhe ne e kemi dëshmuar që e kemi”, – tha Felaj.
Operacionet po orientohen drejt një kategorie që ishte parë si “e paprekshme” dhe, sipas Felajt, kjo duhet t’i inkurajojë njerëzit.
Felaj theksoi se vlen për t’u nënvizuar se presioni do të bëhet në strukturat e policisë, në mënyrë që ajo të kompletojë dosjet që do të dërgojë në Prokurori dhe jo t’ia lërë këtë barrë Prokurorisë.
/a.r
