Përfaqësuesja e Kosovës do të zhvillojë dy ndeshje miqësore, pak muaj para nisjes së Ligës së Kombeve.
Më 31 maj, “Dardanët” do të udhëtojnë drejt Pragës për t’u ndeshur me Çekinë, një kundërshtar i fortë që vjen pas sigurimit të pjesëmarrjes në Botëror.
Historia mes këtyre dy ekipeve është e barabartë, me nga një fitore 2-1 për secilën palë gjatë eliminatoreve të Euro 2020. Pas këtij takimi, skuadra e Franco Fodës do të kthehet në Prishtinë për të pritur Andorrën më 7 qershor në stadiumin “Fadil Vokrri”.
Ky do të jetë një rikthim pas përballjeve në kualifikueset e fundit, ku Kosova regjistroi një fitore dhe një barazim ndaj këtij kundërshtari. Grumbullimi zyrtar i lojtarëve do të nisë më 27 maj, duke shënuar fillimin e punës për sfidat në Ligën B të Ligës së Kombeve.
Atje, Kosova do të masë forcat në një grup të vështirë me Austrinë, Izraelin dhe Irlandën.
