Ish-drejtori i Policisë së Shtetit, Ilir Proda është paraqitur sot (22 shtator) në Prokurorinë e Posaçme, pak orë pas kontrollit në banesën e tij.
Lajmi konfirmohet nga gazetarja Anila Hoxha. Kontrolli ka nisur prej orës 07:00 të mëngjesit sot (22 shtator), në prezencë të vetë ish-kryepolicit.
Ilir Proda shërbeu si Drejtor i Përgjithshëm i Policisë së Shtetit në Shqipëri, deri në mars të vitit 2026.
Fillimisht, agjentët e BKH-së kanë shkuar në banesën e ish-drejtorit të përgjithshëm të Policisë, Ilir Proda, në zonën e Fushës së Aviacionit, ku kanë kryer kontroll në prani të tij.
Me urdhër të Gjykatës së Posaçme, SPAK zhvilloi kontrolle në banesën e Ilir Prodës. Vendimi ka përcaktuar kontroll banese si dhe personal.
Veç Prodës, po kontrollohen edhe banesa të personave të tjerë.
Ende nuk ka informacione zyrtare për shkakun e këtij aksioni, por më herët Proda ka qenë i akuzuar nga opozita si i implikuar në disa çështje, mes tyre lidhjet e tij me disa grupe kriminale, por që asnjëherë nuk kanë pasur prova.
Më herët SPAK i ka bllokuar dhe verifikuar Prodës edhe telefonin. SPAK pritet të japë detaje pas përfundimit të këtij operacioni.
Po sot SPAK ka kryer një tjetër operacion në kuadër të dosjes AKSHI.
Fatjon Kalluci, shef në Laboratorin Shkencor të Policisë, është vënë në pranga në kuadër të operacionit të SPAK lidhur me hetimet për Ergys Agasin.
Gjithashtu është arrestuar edhe Embro Sulejmani, pronar i një biznesi në Durrës.
Ndërkohë po zhvillohen edhe kontrolle në zonën e Shkozetit në Durrës.
