Vihet nën drejtim ish-drejtori i një shkolle 9-vjeçare dhe drejtoresha e Arsimit në Peshkopi, të akuzuar për shpërdorim detyre, për pagën e ish-drejtorit i cili e merrte në mënyrë të paligjshme duke qenë në Angli.
Procedimi penal në gjendje të lirë ka nisur për Avdi Delishin, 25 vjeç, banues në Selishtë, Dibër, ish-drejtor në shkollën 9-vjeçare Selishtë, i dyshuar për kryerjen e veprave penale “Vjedhja duke shpërdoruar detyrën” dhe “Shpërdorim i detyrës”.
Po ashtu nën hetim është vënë Brikena Dani, 39 vjeçe, banuese në Peshkopi, Dibër, me detyrë drejtore në Zyrën Vendore Arsimore Peshkopi, e dyshuar për kryerjen e veprës penale “Shpërdorim i detyrës”.
Procedimi penal ndaj tyre, ka filluar pasi nga veprimet hetimore të kryera ka rezultuar se 39-vjeçarja Dani, ka paguar Avdi Delishi, gjatë periudhës që ai nuk ka qenë brenda territorit të Republikës së Shqipërisë, në Londër, Angli.
Sipas verifikimeve të kryera Delishi, është larguar nga territori i Republikës së Shqipërisë në vitin 2019 dhe ka përfituar paga në mënyrë të padrejtë.
Ndaj të dyshuarve hetimet janë në vijim, ndërkohë që materialet iu referuan Prokurorisë së Dibër, për veprime të mëtejshme.
/a.r
