Ministria e Mbrojtjes ka nisur rekrutimet për ushtarë dhe detarë profesionistë në Forcat e Armatosura.
Nisja e këtij procesi u njoftua nga Ministri i Mbrojtjes Niko Peleshi i cili thekson se ofrohen kushte pagese dhe trajnimi si asnjëherë më parë.
Duke i bërë thirrje të rinjve të shikojnë kushtet e pranimit, Ministria e Mbrojtjes e konsideron thelbësore për Forcat e Armatosura rekrutimin e ushtarëve me një profil sa më të lartë, në kushtet e një profesionalizmi më të lartë të FA dhe një angazhimi gjithnjë e më të madh në përmbushje të detyrave në mbrojtje të vendit dhe në interes të Aleancës.
Pjesë e këtij procesi mund të bëhet çdo i ri nga mosha 18 vjeç deri në 27 vjeç, që nuk ka probleme me ligjin, që ka një figurë të pastër morale, që nuk është person i dyshuar, i padëshirueshëm, i evidentuar dhe implikuar nga organet e zbatimit të ligjit për veprimtari të kundraligjshme apo kriminale.
Gjithashtu në faqen zyrtare të Ministrisë së Mbrojtjes janë publikuar të gjitha kriteret që kërkohen për procesin e rekrutimit, ku përcaktohet edhe kalimi i tre testeve; ai fizik, intelektual dhe psikologjik që do të kryhet në faza të caktuara.
/a.r
