Në “Intervistë” me Merita Haklajn, Bilbil Bitri, Gjeneral Brigade në Forcat e Armatosura u bëri disa herë apel të rinjve që t’i bashkohen Akademisë si një alternative që nuk do t’i zhgënjejë.
Por, si paguhen ushtarakët? Teksa pranoi që vetëm thirrja patriotike për t’i shërbyer vendit nuk mjafton, Bitri theksoi se projeksioni për pagat e ushtarakëve është në ndryshim, me një trend pozitiv.
Sipas tij, përpos rritjes që u bë pagave të ushtarakëve vitin që lamë pas, trajektorja e mbështetjes së qeverisë është në rritje.
“Do vijoj të besoj në atë që kryeministri ka thënë që synimi ynë është që Shqipëria të mos konkurrojë vendet më të zhvilluara, por të jemi në mesataren e vendeve të NATO-s. Është e rëndësishme që nuk jemi në fund të tabelës, por jemi thuajse të barabartë me të tjerët.”
I pyetur nëse trendi i largimit të të rinjve nga vendi i ka prekur edhe Forcat e Armatosura, gjenerali Bitri thotë se mbetet e vështirë t’i mbash të rinjtë, por shtoi se gatishmëria e Forcave të Armatosura nuk është e cënuar.
Komandati i Akademisë së Forcave të Armatosura bëri po ashtu të ditur se së shpejti do të jetë gati edhe Njësia Ushtarake e Mbrojtjes Kibernetike. Kjo njësi, sipas tij me asete të fjalës së fundit, do të jetë në gatishmëri për mbrojtjen kibernetike të FA, por edhe për t’i kontribuar mbrojtjes kibernetike të vendit.
