(Pa)fajësia (innocence) e Doktorit

Nga Artur Ajazi

Sali Berisha doli mbrëmë në një studio televizive, dhe kërkoi  me ngulm dhe mburrje  “pafajësinë nga drejtësia”. Një ish-kryeministër, që akoma nuk ka nisur procesin gjyqësor, nxiton dhe kërkon “pafajësi, pasi ndaj tij janë marrë masa sigurie dhe kanë nisur hetime me procedura të paligjshme”.

Sa qesharakë bëhen politikanët në Shqipëri. Sa mjeranë janë, pikërisht ata që kanë qeverisur dhe kanë sunduar skenën politike në këtë vend, që ç’nuk kanë bërë e ç’nuk kanë zhvatur, dhe ja tani, kërkojnë me mburrje madje “pafajësi”. Berisha tha se “jam i vetmi politikan në Europën e post Luftës Dytë Botërore, që hetohem dhe po gjykohem si i burgosur politik, pa akuza, pa fakte”. Por pa nisur akoma seanca e parë gjyqësore ndaj tij, Doktori nxiton dhe akuzon, bën pis dhe baltos gjithë sistemin e drejtësisë. Dhe kjo ndodh nga një politikan 34 vjeçar, që mban mbi supe akuza qysh nga 1997, dhe në vazhdim.

Ndodh kjo nga një ish-president dhe ish-kryeminister, që thotë se “kam primare zbatimin e ligjit dhe lirinë e mendimit”. Ok. Atëhere Doktor, lëre drejtësinë e re të bëjë detyrën, dhe pastaj të shohë populli, je apo nuk je i pafajshëm. Sikur të gjithë shqiptarët, të vendosnin vetë mbi “fajësinë apo pafajësinë e tyre”, atëhere nuk do të ishte nevoja të kishim  shtet ligjor dhe organe drejtësie. Të sfidosh prokuroritë, gjykatat, organet policore, të sfidosh ligjin, kjo ndodh vetëm në vendet afrikane apo ato diktatoriale. Shqipëria ka sot sistemin e ri të drejtësisë, dhe më efiçentin në Ballkan.

Goditja që SPAK dhe GJKKO, po i japin krimit, trafikut, dhe korrupsionit deri në sferat më të larta të ish-qeverisjes dhe qeverisjes aktuale, tregon seriozitetin e punës dhe vendosmërinë e tyre për ti çuar punët e nisura deri në fund. Nxitimi i Doktorit për të kërkuar “pafajësinë e tij”, madje deri në Strasburg, tregon natyrën agresive dhe aspak tolerancën demokratike, të një politikani që deklaron se “aspiroj për liri dhe demokraci perëndimore”. Mosha e re e kësaj drejtësie, dhe puna e madhe e grumbulluar në zyrat e SPAK-ut dhe GJKKO-së, nuk tregon vetëm zullumet e padëgjuara të ish-qeveritarëve dhe politikanëve, por edhe seriozitetin e atyre që po punojnë me devocion, për ti shkuar deri në fund hetimeve dhe gjykimeve ndaj çdo të arrestuari dhe akuzuari VIP.

Atë që deri dje, nuk e bënte kurrë drejtësia e molepsur e Plepave, po e bëjnë prokurorët dhe gjyqtarët e drejtësisë së re, e “filtruar” nga amerikanët dhe europianët. Puna dhe rezultatet e arritura deri sot, janë një ogur i mirë dhe shpresëplot për shqiptarët, që për 30 e ca vjet, kanë vuajtur dhe përjetuar problematika dhe vuajtje të mëdha, si pasojë e mosfunksionimit të drejtësisë së Plepave, që ngriti në sistem  ish-kryeministri Berisha.

Pafajësia apo fajësia e tij, do të varet nga një proces gjykimi i paparagjykuar, edhe pse nga selia e PD-së dhe frëngjitë e mediave të opozitës, dalin çdo ditë fyerje dhe akuza ndaj prokurorëve dhe gjyqtarëve.