Faza e re e dialogut mes Kosovës e Serbisë, për Behgjet Pacollin e AKR-Së, nuk është vazhdim i asaj ku ka mbetur, por është rishikim i të gjitha marrëveshjeve.
“Dhe çdokush që ka marrë pjesë në këtë proces është i interesuar që të përmbushen premtimet, marrëveshjet. Për këtë ishte numri i madh i kosovarëve atje. Mua mu dukën shumë njerëz atje. Secili ndoshta ka pasur funksionet e veta.
Do të doja të ishte proces më efektiv”, ka thënë Pacolli në Interaktiv të KTV-së.Ai ka thënë se beson se do të ketë marrëveshje përfundimtare.
“Do të donim që Serbia ta njohë Kosovën. Unë mendoj pak më ndryshe. Dua të mos mbetet asnjë proces i pazgjidhur dhe Serbia të japë garanci të forta që nuk do ta pengojë Kosovën në ecjen përpara”, ka thënë ai.
Pacolli ka folur me siguri se “Serbia ka mbledhur një fond të madh që të lobojë për mosnjohjen e Kosovës”.
“Vetë kryediplomati i Serbisë udhëheq këtë ekip. Fillimisht është Burundi, më pas në shtetet tjera në Afrikë, në Amerikën Latine, Suriname e të tjera. Po harxhojnë shuma të mëdha dhe angazhim kundër njohjes së Kosovës”, ka thënë në “Interaktiv”, Ministri i Punëve të Jashtme i Kosovës, Behgjet Pacolli.
“Zoti Daçiq tha edhe për Burundin. E kam incizuar krejt bisedën e Daçiqit me faktorët politikë atje duke u premtuar armatim, tanke, bursa studentëve vetëm që ta tërheqin njohjen e Kosovës. Kemi ndërmarrë çdo masë që kjo të mos ndodhë. Shpresoj që ky shtet do të na kërkojë shpejt lidhjen e marrëdhënieve diplomatike. Kam incizim se kam edhe miq të mi që e kanë incizuar, bisedat zyrtare larg mediave.
E kam dëgjuar duke ofruar prej tankeve e të tjera”, ka thënë Pacolli, përcjell Koha.net. “E shihni se Daçiq i voton shtetet e varfra, jo ato serioze e me traditë të vjetër të demokracisë. Shkon te shtetet që kanë nevojë për mbështetje. Nuk duhet të befasohemi se do të ketë emra të rinj që do të ketë tërheqje të njohjes”, ka shtuar ai më tej. (b.an)
