Partia Agrare Ambientaliste reagon lidhur me përmbytjet në vend duke thënë se nuk pajtohet që njeriu të dorëzohet përballë katastrofës ‘të ashtuquajtur natyrore”.
Kjo parti shprehet se nuk mund të pranohet kjo situatë dhe se mund të ishte parandaluar apo minimizuar.
Në vijim thuhet se reshjet e dendura të shiut në Shqipëri kanë vazhduar me intensitet të lartë përgjatë 48 orëve të fundit, ndërsa autoritetet u kanë bërë thirrje banorëve në zonat e përmbytura që mos të kthehen në banesat e tyre, pasi paraqitet rrezik për jetën e tyre, duke shtuar se nuk mund të mjaftohen me kaq.
Specialistët e fushës në Partinë Agrare Ambientaliste i drejtojnë qeverisë Rama disa pyetje:
-Në çfarë sasie ishin reshjet në pellgjet shimbledhës?
-Sa ishte niveli i ujit që u krijua përgjatë lumenjve?
-Në çfarë nivelesh arriti uji në sipërfaqet e përmbytura, dhe sa kohë ishte kohëzgjatja e përmbytjes?
-Po niveli uji që arriti në argjinatura?
-Në çfarë prurje u matën akset e këtyre lumenjve?
-Ç’nivel prurjeje patën lumenjtë kryesorë që derdhen në këto lumenj?
-Kush mund të na thotë sot në Shqipëri, për gjendjen e digave, të rezervuarve, kanaleve kulluese, veprave të artit, gërryerjen e lumenjve dhe sistemimin e përrenjve, raporton noa.
PAA thotë se këto vepra sot, janë në mëshirë të spontanitetit, e askush nuk di gjendjen e tyre dhe se qeveria nuk e njeh mekanizmin e kontrollit.
Në këtë linjë nënvizohet se edhe pse Kryeministri Edi Rama, mblodhi të ashtuquajturin Shtabin e Emergjencave për situatën e krijuar në vend nga reshjet e dendura të shiut, PAA ngre shqetësimin se ky shtab rezulton shterpë, ose një show mediatik.
Partia Agrare Ambientaliste i kërkon qeverisë, të dalë me të dhëna të sakta për situatën e krijuar duke thënë se PAA ka ngritur grupin e punës, të përbërë nga specialistë të fushës të cilët po monitorojnë aktualitetin e hidhur në tërësi dhe marrjen e të gjitha masave për parandalimin e përsëritjes të dëmeve jo vetëm në njerëz por dhe tek gjëja e gjallë, duke mos lënë jashtë vëmendjes dhe shumë biznese të cilëve “ju janë prerë krahët në mes dhe askush nga qeveria nuk ka treguar vëmendje për të parë rrënimin e tyre”.
Në mbyllje paralajmërohet qeveria se nëse nuk merr masa do përballet me situatë shumë serioze/a.k
