Lëvizja Vetëvendosje dhe Lidhja Demokratike e Kosovës nuk kanë arritur as në takimin e radhës një marrëveshje për formimin e institucioneve të reja. Albin Kurti dhe Lumir Abdixhiku u takuan pas mbledhjes së Grupit Parlamentar të LDK-së, por bisedimet përfunduan pa rezultat konkret.
Pas takimit, Kurti u shpreh se nuk ka lajme për sa kohë nuk ka marrëveshje, duke shtuar se palët do të flasin vetëm kur të arrijnë një dakordësi. Ky ishte takimi i dytë mes dy liderëve brenda dy ditësh, ndërsa edhe bisedimet e mëparshme nuk sollën një zgjidhje politike.
Megjithatë, negociatat mbeten të hapura dhe kontaktet mes dy partive pritet të vijojnë. Ndërkohë, kryetari i LDK-së, Lumir Abdixhiku, nuk bëri asnjë deklaratë për mediat pas përfundimit të takimit. Në mungesë të një marrëveshjeje për çështjet kryesore, përfshirë edhe zgjedhjen e presidentit, mundësia e mbajtjes së zgjedhjeve të reja mbetet ende në tryezë.
Ndërkohë, Kuvendi i Kosovës ka njoftuar se seanca konstituive do të zhvillohet të enjten, duke nisur nga ora 10:00. Në rendin e ditës janë verifikimi i mandateve të deputetëve, betimi i tyre, zgjedhja e kryetarit të Kuvendit dhe zgjedhja e nënkryetarëve.
