Vjosa Osmani, në një intervistë për CNN, deklaroi se Serbia po mundohet që t’i hapë Vladimir Putinit një front të ri në Ballkanin Perëndimor.
Duke folur për sulmin ndaj Policisë së Kosovës, ku mbeti i vrarë një efektiv, Osmani u shpreh: “Plani i mirëmenduar ishte përgatitur për një aneksim të veriut të Kosovës si ai i Krimesë.
Serbia kërkon të lejojë Putinin që të hapë një front të ri në Ballkanin Perëndimor. Është e rëndësishme që kjo të ndalet duke sanksionuar Serbinë. Nëse nuk ka dënim për Serbinë, ajo do të vazhdojë me këto agresione”.
Sipas Osmanit, “provat tregojnë se udhëheqësit e Serbisë kanë lidhje direkte me atë që ndodhi në veri të Kosovës. Në bazat ushtarake të Serbisë janë stërvitur këto grupe terroriste. Armët që u përdorën nga ata kanë ardhur nga ushtria e Serbisë”.
Në lidhje me dialogun për normalizimin e marrëdhënieve Serbi-Kosovë, Osmani tha: “Kosova po sulmohet dhe është viktimë e një agresioni. E para që duam është dorëzimi i terroristëve në Republikën e Kosovës, që të ketë drejtësi.
E dyta, ka vetëm një palë konstruktive në dialog dhe ajo është Kosova, që ka implementuar 99% të detyrimeve të saj. Ndërsa Vuçiç nuk ka implementuar asgjë që nga viti 2011. Republika e Kosovës do të vazhdojë të implementojë detyrimet e saj. Kjo përfshin edhe Asociacionin, por ne duam barazi dhe që Serbia të mbajë përgjegjësi për veprimet kriminale”.
Ajo shtoi se Kosova do të vazhdojë të publikojë dëshmi të reja që tregojnë përfshirjen e Beogradit zyrtar në sulmin terrorist.
“Ka pasur video të qarta se si grupi i Radioçiçit ushtrohet ne shtetin serb. Gjithashtu edhe armët qe i kemi kapur, ato nuk janë të njerëzve të rëndomte. Lidhjen e Radoiçiç me Vuçiçin e shohim edhe ne takime të ndryshme kur ishin bashkë. Në në ditët në vijim do të publikojmë dëshmi të reja që Vuçiç është pas kësaj dhe ka dhënë urdhra. Në fillim kishte një kampanjë të fuqishme të agresionit para se sulmi të ndodh”, tha Osmani./m.j
