Operatori i Shpërndarjes së Energjisë Elektrike shtyn deri në dhjetor afatet e ripagesës për bizneset debitore, duke filluar nga një minimum prej 24 këstesh deri në 144 këste. Bizneset që kryejnë pagesë të menjëhershme të detyrimit u reduktohet 50 për qind e kamatëvonesës.
Administratori i OSHEE-së, Ardian Çela, prezantoi dje në Elbasan skemat e reja për biznesin. Duke u ndalur te skemat aktuale, administratori tha se aktmarrëveshjet e reja, miratuar në maj për bizneset, kanë trefishuar afatet e shlyerjes së kësteve, dhe kjo ka ndikuar në reduktimin e shumës së këstit.
Mbi 20 mijë biznese kanë aktmarrëveshje me Operatorin e Shpërndarjes së Energjisë deri në gusht 2016, rreth 25% prej tyre e kanë paguar menjëherë detyrimin, duke përfituar 50% falje të kamatës ose 3.2 milionë euro, shkruan panorama.
Çela shpjegoi se bizneset që janë të rregullta në pagimin e kësteve të debisë u falet 15 për qind e kamatëvonesës. Një pjesë e bizneseve të pranishme në takim kishin aktmarrëveshje me OSHEE-në dhe kryesisht u shprehën të kënaqur për mundësinë e zbatimit të skemës së re, në raport me të parën, pasi “kishte afate të shkurtra dhe këste të larta”.
SKEMA E RE
Afati i pagesës së kësteve, nga 5 vjet që ishte me skemën e mëparshme arrin deri në 12 vjet. Në skemën e parë përfshihet biznesi që ka detyrime të papaguara deri në 100 mijë lekë, të krijuara deri në dhjetor 2015 -e paguan borxhin me 24 këste apo 2 vjet.
Sipas OSHEE–së, çdo 12 këste u ulet kamata e mbetur me 15 për qind, por jo më shumë se 30 për qind. Në skemën e dytë përfshihet biznesi që ka detyrime të papaguara, që variojnë nga 100 mijë lekë deri 500 mijë lekë, të krijuara deri në dhjetor 2015 -e paguan borxhin me 84 këste apo 7 vjet.
Pas 6 këstesh, kësaj kategorie i ulet kamata e mbetur me 2 për qind, por jo më shumë se 30 për qind. Biznesi që ka detyrime të papaguara që variojnë nga 500 mijë lekë deri në 1 milion lekë, e paguan borxhin me 120 këste apo 10 vjet. Pas 6 këstesh, kësaj kategorie i ulet kamata e mbetur me 2 për qind, por jo më shumë se 30 për qind.
Në skemën tjetër përfshihet biznesi që ka detyrime të papaguara mbi 1 milion lekë, ku debia paguhet me 144 këste apo 12 vjet, nga 10 vjet që ishte më parë. Edhe kësaj kategorie, pas 6 këstesh, i ulet kamata e mbetur me 2 për qind, por jo më shumë se 30 për qind.
Për përfitimin e faljes së kamatave nga pagimi i borxheve me këste, biznesi duhet të respektojë kushtet e aktmarrëveshjes, të cilat, sipas OSHEE–së, janë riskedulimi i aktmarrëveshjes, duke përfshirë këstin e pagueshëm për aktivizimin e aktmarrëveshjes në masën 30 për qind të detyrimit të prapambetur, si dhe këstet e tjera bazuar në periudhën e mbetur nga aktmarrëveshja origjinale./a.k
