Operatori i Shpërndarjes së Energjisë Elektrike (OSHEE) njoftoi të shtunën se humbjet në rrjet kanë rënë në nivelin 25.3 % në fund të muajit shtator të këtij viti, ndërsa arkëtimet llogariten 52 milionë dollarë.
OSHEE publikoi të dhënat e treguesve të muajit shtator dhe rezultatet progresive të 9-mujorit të këtij viti. Sërish sipas OSHEE-së, konfirmohet ecuria pozitive në rritjen e arkëtimeve dhe shënohet një tjetër rekord historik sa i takon uljes së nivelit të humbjeve në rrjet.
Niveli i arkëtimeve në total, si 9-mujor ka arritur në rreth 500 milionë dollarë ndërsa vetëm në muajin shtator rezulton të jenë arkëtuar 52 milionë dollarë. Krahasuar me të njëjtën periudhë 9-mujore të vitit 2014 janë arkëtuar 150 milionë dollarë më shumë, ndërsa krahasuar me vitin 2013 kjo diferencë shkon në 200 milionë dollarë më shumë.
“Vendosmëria për të rikthyer ligjshmërinë në konsumin e energjisë elektrike po sjell ulje të tjera rekord në nivelin e humbjeve në rrjet. Në shtator 2015, humbjet zbritën në nivelin 25.3%. Krahasuar me shtatorin 2014 kemi 6.4 % më pak humbje, ndërsa krahasuar me të njëjtin muaj të vitit 2013 kemi 9.8% më pak humbje”, thuhet në deklaratën për shtyp të OSHEE-së.
Humbjet në total si 9- mujor, tekniket dhe jo tekniket, arritën në 31.1 %, nga 38.7 % që ishin në të njëjtën pjesë të vitit 2014-n, dhe 43.4% të regjistruara në 9- mujorin e parë 2013.
Bazuar mbi ecurinë e rezultateve, kompania po e zgjeron planin e saj të investimeve nga fondet e veta. Shuma e planifikuar për investime në këtë vit ka arritur në 70 milionë dollarë dhe nga të dhënat e fundit rezulton se realizimi i investimeve është në masën 61%.
