Operatori i Shpërndarjes së Energjisë Elektrike, OSHEE planifikon që gjatë vitit 2016 të investojë 12 miliardë lekë, ku 7.7 miliardë lekë do të jenë financim i saj, ndërsa pjesa tjetër nga donatorët.
Sipas OSHEE-së, në total për vitin 2015 u arkëtuan 65,7 miliard lekë, ndërsa në vitin 2014 ishin arkëtuar 49,7 miliard lekë dhe në vitin 2013 vetëm 38,3 miliard lekë.
Niveli i humbjeve, sipas të dhënave, për vitin 2015 u ul në 31.3%. Një vit më parë ato ishin 37.8% ndërsa në vitin 2013 arrinin në 45%. Nga të dhënat paraprake, bëhet e ditur se bilanci i OSHEE për vitin 2015 del pozitiv me 14,9 miliard lekë. Lidhjet e reja, referuar të dhënave të publikuara, si një tjetër tregues i rikthimit të ligjshmërisë në konsumin e energjisë elektrike u rritën me 34% në raport me një vit më parë ndërsa u instaluan 34 mijë matësa.
Kjo situatë e përmirësuar ekonomiko-financiare ka mundësuar që OSHEE të rrisë investimet aq të domosdoshme për përmirësimin e rrjetit të shpërndarjes. “Gjatë vitit 2015 investimet ishin 7.5 miliardë lekë me fonde të OSHEE, lekë për kryerjen e investimeve ndërsa gjatë vitit 2016 me fondet e OSHEE por dhe ato të projektet të Bankës Botërore për rimëkëmbjen e sektorit energjitik planifikohet të investohen deri në 12 miliardë lekë (7.7 miliardë nga OSHEE dhe pjesa tjetër nga donatori)”, bën të ditur OSHEE.
