Drejtori i Drejtorisë rajonale të OSHEE, Tiranë, Klevis Jahaj, në një prononcim për mediat ditën e sotme, shpjegoi se mungesa e energjisë elektrike ka ardhur si pasojë e dëmtimit nga palët e treta, kryesisht firma private të kontraktuara nga bashkia e Tiranës apo Ujësjellësi që kryejnë punime në infrastrukturën publike.
Drejtori Jahaj ka sqaruar se për çdo rast konstatimi të dëmtimeve, kompania OSHEE ka depozituar kallëzim penal në prokurori. Kreu i OSHEE për Tiranën ka garantuar qytetarët se punonjësit e OSHEE janë në gatishmëri të plotë për riparimin sa më shpejt të defekteve.
Gjatë fjalës së tij, ai vuri në dukje se është ngritur grupi i punës për rakordimin e punëve publike që do kryhen në Tiranë.
“Ne u kemi bërë thirrje të vazhdueshme për më shumë kujdes jo vetëm operatorëve por dhe institucioneve të tjera që kryejnë investime publike në rajonin e Tiranës. Ditët e fundit, nga një mbledhje e zhvilluar së bashku me bashkinë e Tiranës dhe Ujësjellësin, kemi ngritur një grup pune të përbashkët i cili do të rakordojë të gjithë punët publike që do të kryhen në Tiranë, dhe kemi kërkuar përfshirjen e punonjësve tanë në çdo projekt ku po punohet, për të diktuar në qoftë se ka prezencë e rrjetit elektrik në zonat ku ata do të punojnë. Ka raste, kur nuk njoftohemi për punimet që do të kryhen jo vetëm për shkak të investimeve por dhe defekteve që mund të ketë Ujësjellësi. Ne i bëjmë thirrje Ujësjellësit dhe firmave kontraktore, që të pajisen me azhornimet e rrjetit elektrik në rajonin e Tiranës”, tha ai.
Gjithashtu, sipas tij, është shumë e rëndësishme që këto grupe të rakordojnë me njëra tjetrën që incidente të tilla të mos ndodhin.
Nga ana tjetër ai i ka thirrje të gjithë operatorëve dhe institucioneve të tjera të jenë të kujdesshëm në punët që kryejnë kryesisht në zonat ku kalon rrjeti energjetik. /b.d
