Atleti paraolimpik afrikano-jugor Oscar Pistorius është dënuar me gjashtë vjet burg për vrasjen e të fejuarës së tij, Reeva Steenkamp, me katër plumba, natën e Shën Valentinit më 2013.
Pistorius, i cili gjithmonë ka këmbëngulur se bëhej fjalë për një vrasje aksidentale, pasi nuk e njohur të fejuarën kur i hyri në shtëpi, mund të ishte dënuar më rëndë, deri në 15 vjet, por ndërkaq mund të dalë pas dy vitesh, për sjellje të mirë.
“Besoj se një dënim më i gjatë nuk është i drejtë, tashmë ka kaluar mjaft kohë në burg dhe në arrest shtëpie dhe është një kandidat ideal për programin e rehabilitimit”, tha gjyqtari Thokozile Masipa në arsyetimin e vendimit.
Pistorius nga ana e tij shpresonte të dilte më mirë, duke mos shkuar në burg, por në spital psikiatrik, gjë që nuk u pranua nga trupi gjykues. Pas dy vjetësh, me kryerjen e një të tretës së dënimit, për sjellje të mirë, kampioni paraolimpik mund të dalë nga burgu, në moshën 32 vjeç, duke e pasur gjithë jetën përpara.
Ndërkaq, vendimi i gjykatës nuk është pritur mirë nga familja e së ndjerës.
gds/d.i.
