Shqipëria nuk e ka luksin që të vazhdojë të vonojë drejtësinë. Ky ka qenë apli i bërë nga zv/ kryetari i prezencës së OSBE-së në Tiranë, Robert Wilton, gjatë prezantimit të raportit të Prezencës së OSBE-së “Monitorimi i Gjykimeve Administrative në 2015, në gjykatat administrative të shkallës së parë dhe në Gjykatën Administrative të Apelit”. Sipas tij, kur u ngrit sistemi i gjykatave administrative, në nëntor 2013, qytetarët kishin pritshmëri të larta nga drejtësia, mes tyre, gjykime të drejta dhe pa vonesa.
“Prezenca, duke nderuar angazhimin afatgjatë të Shteteve pjesëmarrëse të OSBE-së për të garantuar shqyrtim gjyqësor të efektshëm të vendimeve administrative, filloi projektin e monitorimit të drejtësisë administrative në Shqipëri, për të identifikuar mangësitë dhe mënyrat për t’i plotësuar ato. Monitorimi i Prezencës synonte të vlerësonte nëse sistemi i ri i gjykatave administrative funksionon në përputhje me standardin ndërkombëtar për gjykim të drejtë dhe me ligjin për Gjykatat Administrative”, theksoj Wilton.
Në lidhje me kohëzgjatjen e gjykimeve, Prezenca konstatoi faktin pozitiv se shqyrtimi i çështjeve nga gjykatat e shkallës së parë është relativisht i shpejtë dhe nga ana tjetër, për shumicën e gjykatave administrative të shkallës së parë, infrastruktura që duhet të mundësojë akses të efektshëm në gjykata rezultoi e pamjaftueshme.
“Në lidhje me të vetmen Gjykatë Administrative Apeli në vend, monitorimi tregoi se kuadri ligjor nuk e ndihmon ngarkesën e punës së që ka aktualisht kjo Gjykatë. Prezantimi i kolegëve të mi do të japë më shumë hollësi mbi gjetjet dhe do të paraqesë disa rekomandime. Shqipëria nuk e ka luksin që të vazhdojë të vonojë drejtësinë. Gjykatave iu duhen akorduar burimet e nevojshme që të përmbushin detyrat në mënyrë efikase, që rikthen besimin dhe pritshmërinë e qytetarëve tek institucionet”, theksoi zv/ kryetari i OSBE-së.
Me. Ar
