Një sondazh konfidencial i OSBE-ODHIR-it, mbërritur në zyrat e Kuvendit të Shqipërisë, ka shkaktuar reagime të forta në radhët e deputetëve të opozitës. Sondazhi që kishte për qëllim verifikimin e pjesëmarrjes gjinore të deputetëve në Parlament, është denoncuar publikisht nga deputeti demokrat dhe ish-ministri i Shëndetësisë, Tritan Shehu.
Duke e quajtur provokim nga zyra e “OSBE”, deputeti Shehu kundërshton fort një nga pikat e pyetësorit ku deputetëve u kërkohet të përcaktojnë “seksin” e tyre përmes tri varianteve mashkull, femër apo të tjerë.
Deputeti Tritan Shehu qartëson edhe zyrën e OSBE se Shqipëria në ligjet e saj njeh vetëm dy opsione: gjininë mashkullore dhe femërore. E po ashtu dhe në kodi i familjes, thotë deputeti, njeh vetëm familjen që përbehet nga një burrë dhe nga një grua.
Tritan Shehu i kërkon OSBE-së të tërhiqet nga ky sondazh, duke e quajtur sa qesharak po aq edhe provokativ.
A2 CNN pyeti prezencën e OSBE në Shqipëri, e cila tha se sondazhi nuk është përgatitur në Tiranë, por nga zyra e ODHIR-it me qendër në Varshavë. Ndërsa Kuvendi i Shqipërisë në përgjigjen e tij e cilëson thjeshtë një praktikë që po bëhet edhe në vendet e tjera të rajonit.
‘’Kuvendi i Republikës së Shqipërisë së bashku me ODIHR (Zyra për Institucione Demokratike dhe të Drejtate Njeriut e OSBE-së )po punojnë së bashku për të kryer një auditim të pjesëmarrjes gjinore në Kuvend. Auditimi i pjesëmarrjes gjinore do të zbatohet në bazë të Auditimeve të ODIHR për pjesëmarrjen gjinore të parlamenteve. Pyetësori është standart dhe është përdorur më herët në auditime të ngjashme nga ODIHR në parlamente si: Mal i zi, Maqedoni e Veriut, Maltë dhe aktualisht të njëjtin proces po ndjekin edhe parlamentet e Sllovenisë dhe Portugalisë dhe Shqipërisë’’.
Sipas këtij njoftimi qëllimi i auditimit të pjesëmarrjes gjinore është të ndihmojë parlamentet që të vlerësojnë në çfarë mase janë të ndjeshëm dhe reagojnë ndaj gjinisë në funksionet e tyre kryesore të përfaqësimit, legjislacionit dhe mbikëqyrjes, si dhe të formulojë rekomandime për të përmirësuar ndjeshmërinë gjinore brenda Parlamentit.
Por për ekspertët ligjorë, nisma e OSBE-ODHIR bie ndesh me ligjin për barazinë gjinore në shoqërinë shqiptare. Në ligjin përkatës të vitit 2008, që në nenin e parë të tij, thuhet se ky ligj rregullon çështjet themelore të barazisë gjinore, mbrojtjes dhe trajtimit të barabartë mes grave dhe burrave. Sipas ekspertëve, ligji nuk lë shteg për interpretime për prani dhe variante të tjera, veç gjinisë mashkullore dhe femërore.
/a.r
