Gjatë një vizite në Shqipëri, e cila do të kryesojë OSBE-në në vitin 2020, Kryetari i radhës i OSBE-së për këtë vit, Ministri i Jashtëm dhe për Evropën i Sllovakisë, Miroslav Lajčák, nuk kurseu kritikat për opozitën.
Sa u takon protestave të kohëve të fundit, Lajčák tha se të dëgjuarit e zërave kritikë ka rëndësi kyçe në një shoqëri demokratike.
“Megjithatë, dallimet duhet të debatohen në parlament nga të gjithë përfaqësuesit, përfshirë opozitën, dhe jo në rrugë”, tha ai.
“Dhuna dhe bojkotet ndërpresin çdo mundësi për dialog, pra çdo mundësi për të gjetur gjuhën e përbashkët, si edhe dëmtojnë përparimin dhe imazhin publik të Shqipërisë”, vijoi Lajçak.
“Demokracia kërkon sistemin e kontrollit dhe balancës dhe një opozitë funksionale ka një rol kyç për të luajtur në këtë drejtim” theksoi ai dhe shtoi:
“Pjesëmarrja në institucionet demokratike është e vetmja rrugë e ligjshme drejt pushtetit politik”.
Gjatë qëndrimit në Tiranë, Kryetari i radhës i OSBE-së u takua me përfaqësues të shoqërisë civile, për të dëgjuar prej tyre lidhur me situatën aktuale në vend, përparimin e bërë, si dhe për përpjekjet e mëtejshme që duhen për reformat.
Ministri i Jashtëm sllovak, Miroslav Lajčák ka përjashtuar nga Tirana mundësitë e ndërhyrjes së ndërkombëtarëve për zgjidhjen e situatës politike. Sipas tij, forcat politike në vend mund dhe duhet ta zgjidhin përmes dialogut këtë situatë me fokus zgjedhjet e fundit të qershorit.
/a.rada
