Misioni i OSBE në Tiranë ka reaguar ashpër pas skenave të dhunës ndaj disa KZAZ-ve.
Në një deklaratë për mediat, OSBE shprehet se jo vetëm ata që dhunojnë materialet, por edhe organizatorët e nxitësit e tyre duhet të përgjigjen para ligjit.
Kjo thirrje vjen pas akteve vandale ndaj materialeve zgjedhore nga ana e ish-deputetëve të PD-LSI dhe militantëve të tyre në bashkitë e djathta.
Reagimi i plotë:
Prezenca e OSBE-së i dënon me forcë sulmet e dhunshme të këtyre ditëve kundër organeve përgjegjëse për organizimin e zgjedhjeve, në disa bashki në Shqipëri. Të gjitha proceset politike dhe administrative duhet të zhvillohen në përputhje me parimet e shtetit ligjor.
Çdo përpjekje për të nxjerrë nga shinat procesin demokratik, përmes veprimeve të dhunshme, përbën shkelje të ligjit, pengon përparimin e vendit dhe njollos reputacionin e tij ndërkombëtar.
Jo vetëm autorët e dhunës, por edhe nxitësit e saj, duhet të mbajnë përgjegjësi ligjore. Ne bëjmë thirrje që autoritetet shtetërore të ndërmarrin të gjitha masat, sipas legjislacionit në fuqi, për të hetuar dhe ndjekur penalisht përgjegjësit e dhunës.
Gjithashtu, u bëjmë thirrje organizuesve të protestës së të premtes të sigurojnë një protestë paqësore.
Në përputhje me mandatin e saj, Prezenca e OSBE-së mbetet e gatshme të mbështetë shtetin ligjor dhe demokracinë në Shqipëri.
