Misioni i OSBE në Tiranë ka reaguar në lidhje me protestën që opozita ka lajmëruar se do të mbajë ditën e nesërme në Bulevardin “Dëshmorët e Kombit”.
Përmes një njoftimi zyrtar OSBE bën me dije se shpreson që protesta e së shtunës të jetë sa më paqësore e demokrate.
Ky reagim për protestën erdhi pas takimeve të delegacionit të nivelit të lartë të Asamblesë Parlamentare të OSBE-së me Presidentin Meta, kreun e Kuvendit Ruçi, krerët e opozitës Basha e Kryemadhi si dhe ministrin e Jashtëm Bushati.
Statusi i plotë:
Një delegacion i nivelit të lartë të Asamblesë Parlamentare (AP) të OSBE-së, i cili përbëhet prej Presidentit të saj George Tsereteli dhe Sekretarit të Përgjithshëm Roberto Montella, po zhvillon një vizitë zyrtare në Shqipëri.
Zyrtarët e lartë kanë zhvilluar takime me Presidentin e Republikës Ilir Meta, Kryetarin e Kuvendit Gramoz Ruçi, Ministrin për Evropën dhe Punët e Jashtme Ditmir Bushati dhe Kryetarët e Partisë Demokratike dhe Lëvizjes Socialiste për Integrim Lulzim Basha dhe Monika Kryemadhi.
Gjatë takimeve ata shprehën vlerësimin e tyre sa i përket mbështetjes së Shqipërisë për veprimtaritë e OSBE-së, si dhe gatishmërinë e AP të OSBE-së për ta shoqëruar popullin shqiptar dhe udhëheqësit e tij në procesin e reformave që po implementohet në vend.
Në lidhje me protestën që do të mbahet të shtunën nga Opozita shqiptare, shprehën shpresën se ajo do të jetë paqësore dhe demokratike.
