Sapo gjykata e Krimeve të Rënda ka vendosur masën e arrestit në shtëpi për ish-ministrin e Brendshëm Samir Tahiri, prokurorët kanë mbërritur në banesën e tij ku i kanë komunikuar në prani të avokatit vendimin e drejtësisë.
Por çfarë ndodhi deri në këtë vendim?
Orë të ethshme kanë qenë këto të sotmet për Tahiri, i cili do të ngujohet duke nisur nga sot në shtëpinë e tij, pasi është i dyshuar për kryerje të veprave penale “Trafikimi i narkotikëve”, në bashkëpunim, në formën e grupit të strukturuar kriminal dhe, “Korrupsion pasiv i funksionarëve të lartë shtetërorë ose i të zgjedhurve vendorë”. Gazetarja Klodiana Lala në një lidhje direkte për ‘News24’ nga jashtë ambienteve të Prokurorisë së Krimeve të Rënda deklaroi se Tahiri pothuajse gjatë gjithë ditës së sotme ka qëndruar në shtëpinë e tij, në zonën e Kodrës së Diellit. Por vetëm për pak çaste ai ka dalë nga shtëpia, për të konsumuar një kafe aty pranë në lagje. “Saimir Tahiri në informacionet që disponoj, ka qenë në ambientet e shtëpisë së tij në Kodrën e Diellit. Është parë ka dale të shijonte një kafe aty pranë lagjes”, tha Lala.
Po ashtu Lala vijoi me itinerarin e ndjekur sot. “Pasi prokurorët kanë marrë këtë urdhër, janë drejtuar tek Tahiri, ku ia kanë komunuar në prani të Mask Haxhias vendimin. Në orën 09:20 minuta në ambientet e Gjykatës së Krimeve të Rënda është paraqitur gjykatësja Liljana Baku. Për më shumë se 8 orë kane qëndruar e ngujuar në zyrën e saj. Gjatë gjithë ditës kemi parë Gentian Hasanin, Besim Hajdar Matajn, prokurorët e kësaj çështje. Rreth orës 19:15 minuta Liljana Baka ka lënë ambientet bashkë me dy sekretaret, njëra prej të cilave ka qenë me një fëmijë”, tha Lala. Më pas ajo shtoi se në ambientet e Gjykatës së Kriemve të Rënda janë paraqitur dy zyrtarë të lartë të policisë Aida Hajnaj Zv/drejtoresha e Policisë dhe Eduard Merkaj. Fill pas kësaj, më pas prokurorët janë paraqitur në shtëpinë e Tahirit, ku këtij të fundit i është komunikuar masa e marrë.”, tha ajo.
Lala raportoi se zyrtarisht kërkesa e prokurorisë është paraqitur mëngjesin e ditës së sotme.
“Nuk ka një seancë mes palëve por me ndryshimet e reja të kodit penal, vepron mbi bazën e dokumentacionit. Në seancë i pranishëm nuk është asnjë nga palët. Gjykatësja është ngujuar në zyrën e saj, ka shqyrtuar të gjithë dokumentacionin e dorëzuar nga Prokuroria dhe në përfundim ka vlerësuar të arsyeshme të caktojë jo masën e arrestit me burg por masën e arrestit shtëpiak, bazuar në ato prova që ka pasur në duar. Në momentin që prokuroria paraqet kërkesën, nuk ka asnjë pengesë për të vepruar më pas.
Kujtojmë se për Arbër Çekaj, gjykata për Krime të Rënda ka vepruar disa orë vetëm pasi prokuroria dorëzoi kërkesën për masën e arrestit me burg. Nuk ka asnjë pengesë ligjore, nuk ka dyshime të natyrës që mund të ndërhynte. Zonja Prela, kryetarja e emëruar e Prokurorisë së Krimeve të Rënda është parë të paraqitet gjatë ditës së sotme vetëm pak minuta para se dy zyrtarë të policisë së Shtetit të ngjisnin shkallët e Prokurorisë”, tha Lala.
