Analisti i njohur politik maqedonas Sasho Ordanovski në një analizë të tij të publikuar së fundmi ka theksuar se VMRO-DPMNE apo krerët e saj që i quan si “Familja”, me në krye kushërinjtë Nikolla Gruevski dhe Sasho Mijalkov, po përgatisin skenare të reja për të shpëtuar kokën nga akuzat e ngritura për krime të ndryshme dhe keqpërdorime grandioze të pushtetit.
Ai thotë se shpëtimi nga kjo nënkupton edhe një skenar tjetër “Kumanova2” apo veprime të tjera të ngjashme. Siç shkruan ndër të tjera Ordanovski, sa më keq të jetë situata për “Familjen” është aq më mirë.
Një paralajmërim i një skenari të rrezikshëm është ndërhyrja e njësitit “Alfa” rreth ambasadës amerikane në Shkup, ku ata ishin për një stërvitje në situata emergjente. Këto veprime që janë ndërmarrë pa dijen e ministrit të brendshëm, siç shkruan Ordanovski, janë të rrezikshme dhe se alarmojnë diçka, citohet Express. (b.an)
