Kur ka kaluar më shumë se dy javë nga zhdukja misterioze e biznesmenit italian në Shqipëri, Davide Pecorelli, mediat përtej Adriatikut hedhin dyshime mbi hetimet e vonuara të policisë shqiptare.
“Umbria Domani” shkruan sot se ka shumë aspekte të ngjarjes që duhet të sqarohen djhe që lidhen veçanërisht me lëvizjet e tij të fundit në Shqipëri.
Sipas saj, ka ende shumë pyetje që presin përgjigje dhe aspekte të ngjarjes që policia shqiptare i ka anashkaluar.
“Si ka mundësi që telefoni dhe ora e Davides u gjetën pa dëmtime, kur makina e djegur u shkatërrua plotësisht? Për hetuesit shqiptar, zjarri mund të ketë qenë aksidental, por nuk shpjegohen shkaqet e zjarrit. Tezat e hetuesve lokalë nuk janë aspak bindëse, ka ende shumë pyetje pa përgjigje dhe zhdukja e Davide Pecorellit është gjithnjë e më tepër një mister që nuk bind pjesëtarët e familjes”, shkruhet në artikull.
Me kalimin e ditëve skenarë të rinj janë hapur lidhur me vdekjen e 45-vjeçarit me origjinë nga Lama e San Giustino, një sipërmarrës në sektorin estetik dhe parukeri, me aktivitete në Arezzo dhe Castello.
Pecorelli është baba i katër fëmijëve, tre prej të cilëve i ka nga martesa me gruan e parë dhe një tjetër e ka nga martesa me një shqiptare.
Hetimet lidhur me rastin, nisën nga policia shqiptare, por përmes Interpolit u angazhua edhe Zyra e Prokurorit Publik të Perugias.
Tashmë po priten ende rezultatet e ADN-së të kockave të gjetura në automjetin “Skoda Fabia” që u gjet e djegur në Gjegjan të Pukës.
Ish-gjyqtari i futbollit mbërriti në 3 janar në Shqipëri. Ai shkoi në Vlorë dhe më pas në Shkodër me destinacion përfundimtar Pukën ku qëndroi për dy netë.
Më 6 janar Davide humbi kontaktet me të afërmit, dhe nuk dihet nëse eshtrat në makinën e djegur i përkasin atij.
Në një mesazh të dërguar në “WhatsApp” për një mik biznesmen në Itali, Peccoreli shkruan: “Unë hapa një show-room në një qendër tregtare… Deri në datën 6 është luftë. Unë kam rezervuar biletën e kthimit për 10 janar”.
/a.r
