Nga Artur Ajazi
Në 1945, kur komunistët nisën ofensivën ndaj shtresave të pasura, ndër akuzat më të shpeshta të tyre ishin edhe se “keni vënë pasuri në kohë lufte”. Realisht në kohë lufte, edhe vihet pasuria, pasi ai që është tregetar, përfiton nga kaosi dhe anarshia. Por ja që, pas 1945, e pësuan shumica e tyre, duke u marrë edhe ç’kishin vënë me të padrejtë. Por ç’tu themi opozitarëve tanë, që edhe pse në kohë qetësie, pa pushtet dhe ofiqe, na rezultojnë pasanikër.
Na rezultojnë se e kanë rritur pasurinë e tyre, në 5 ose 10 herë më shumë se çfarë e kishin para 13 vitesh. Por pse dhe si shpejgohet kjo ? Ndërkohë kanë 13 vite që bërtasin, akuzojnë, dhe thonë se “me korrupsion qeveritarët janë bërë miliardierë”, nuk e shpjegojn asnjë prej tyre, si u bënë me superpasuri shumica e opozitarëve ? E kemi parë, dëgjuar dhe lexuar, se si rritet në proporcion të zhdrejtë me deklarimet e tyre, pasuria e çdo deputeti të opozitës. Pa përjashtuar jo vetëm nga PD, por edhe nga partitë e tjera të vjetra dhe të reja. Janë me troje, dyqane, biznese, miliona në banka, bëjnë mitingje në Shqipëri dhe Europë, dalin jashtë shtetit kur të duan, bëjnë pushime luksi, dasma përrallore, bëjnë lobime, gostira, blerje të shtrenjta. Por a mund të thotë njëri prej tyre, si dhe ku i gjejnë milionat ? U ka lënë gjyshi, kunati, apo vjerra ndonjë pasuri të tillë ?
Natyrisht nuk e përjashton njeri as pazaret me ndonjë ministër, drejtor drejtorie, apo edhe më lart, por ajo që vlen të theksohet dhe mendohet është fakti se ata janë milionerë, dhe se pasuria e tyre nuk ka burime të sigurta dhe të sinqerta. Dihet se politikanët në Shqipëri, kanë 35 vjet që luajnë mbi pista të qelbura, dhe notojnë në miliona të pista, të cilat e kanë burimin nga paratë tona, dhe ato që vijnë nga bota, me marifete të tjera. Tek dëgjoj se si hidhen përpjetë si karkaleci ata të Partisë Demokratike, duke fyer dhe akuzuar çdo deputet dhe qeveritar nga Partia Socialiste, dhe shoh se si fryhen majë makinave 150 mijë euroshe dhe vilave 1 milion dollarëshe, e vetmja gjë që besoj është fakti se, këtu opozita është hipokrite, e molepsur në afera të pista, dhe e pabesueshme politikisht. Kjo siç duket të bën të besosh edhe faktin dhe realitetin tjetër se, kjo opozitë mëkatare do të rrijë atje ku është, edhe 13 vite të tjera.
Berisha duket entuziast pse humbi, dhe pse do rrijë edhe 4 vite në opozitë. Përpjekjet e tij se “ne nuk njohim zgjedhjet dhe rezultatin e tyre të 11 Majit”, janë grimca homoristike që askush edhe nga PD-ja nuk i beson dhe merr më seriozisht. Ai dhe shpura e tij, edhe pse në opozitë rezultojnë të pasur dhe aspak të fukarepsur, rezultojnë me rritje milionash në banka dhe pasurie, dhe aspak me “xhepa të shkundur” siç rreket të prezantohen në opinionin publik. Djemtë, vajzat, mbesat dhe farefisi i tyre, janë sot me biznese, firma private, resorte, kanë vila dhe pallate, pasuri të cilat shtohen nga viti në vit. Atëhere pse llomotisin lart e poshtë, dhe përpiqen të shtiren sikur po “luftojnë për liri, drejtësi e barazi popullore”, kur ata janë dhe hanë në një “çanak” me ata që heton SPAK dhe gjykon GJKKO.
Kjo opozitë veç pabesueshmërisë, mbart mbi supe edhe damkën e turpit, për gjithçka ka bërë deri sot ndaj vendit dhe shqiptarëve. Kjo opozitë, e ka mbyllur kapitullin e saj politik, ajo sot lëvrin thjesht për të kapur ca para më shumë. Kaq.
