Opozita ka thirrur sot një protestë masive në bulevardin Dëshmorët e Kombit, pas përmendjes së emrit të kryeministrit Edi Rama në çështjen McGonigal, për të cilin demokratët thonë se është përfshirë në një aferë korruptive me qëllim shkatërrimin e opozitës.
Në këtë protestë, e cila është parashikuar në mesditë demokratët kërkojnë dorëheqjen e kryeministrit Edi Rama.
Nëse në tubimet e mëparshme kryefjalë kundër Qeverisë ka qenë keqmenaxhimi i taksave të qytetarëve dhe varfëria, këtë herë kauza ka ardhur nga përtej Atlantikut dhe protesta sipas opozitës është tërësisht politike.
Për organizimin e protestës është njoftuar edhe Policia e Shtetit, e cila ka marrë masat për mbarëvajtjen e saj dhe bllokimin e disa rrugëve. Një ditë më parë Berisha e paralajmëroi policinë të mbaj qëndrimin korrekt.
“Çdo protestues i lënduar do të konsiderohet i persekutuar politik. Madje të mos futen fare në turmë”, tha ai.
Nga ora 12:00 që nis protesta, do të jetë i bllokuar Bulevardi “Dëshmorët e Kombit” dhe të gjitha drejtimet që lidhen me bllokun e rrugës së Elbasanit.
Protestuesit fillimisht do të mblidhen tek selia e Partisë Demokratike, në sheshi “Skënderbej” dhe atë Nënë Tereza dhe më pas do të zhvendosen para kryeministrisë. Sipas organizatorëve, në shesh do të jenë rreth 100 mijë qytetarë. Ndërkohë një ditë më parë u blindua godina e kryeministrisë dhe Kryesia e Kuvendit.
/a.r
