Opozita do të rikthehet sot në komisionin e posaçëm të reformës në drejtësi. Komisioni pritet të mblidhet sot paradite për të diskutuar ligjin e SPAK. Mbledhja vjen pas dakordësise opozitë-mazhorancë, me ndërhyrjen e OPDAT. Opozita do marr pjese në mbledhje pas disa ditësh bojkot të komisionit.
Pritet që më 6 tetor, mes 6 ligjeve për Reformën në Drejtësi, ligji për SPAK-un, të miratohet me konsensus. Ky ligj rregullon funksionimin e Prokurorisë së posaçme, Byrosë Kombëtare të Hetimit dhe gjykatave speciale, përgjegjëse për luftën kundër krimit të organizuar dhe korrupsionit.
Nga 3 çështjet e kundërshtuara prej demokratëve dy javë më parë, ishte lënë pa zgjidhur vetëm njëra prej tyre, ajo që lidhej me shqetësimin e opozitës për ndikimin e qeverisë në emërimin e gjyqtarëve, prokurorëve apo punonjësve të SPAK-ut.
Sipas opozitës, qeveria mund ta bënte këtë nëpërmjet rolit vendimmarrës të dy institucioneve në varësi të saj, që do të kontrollonin pasurinë dhe figurën e kandidatëve për anëtarë të strukturave të SPAK-ut.
Marrëveshja bazohet tek amendamenti i paraqitur nga opozita në mes të shtatorit, duke ia lënë këtë detyrë fillimisht organit që do të bëjë “vetting”-un dhe më pas një komisioni “ad hoc” të përbërë nga anëtarë të 3 strukturave të SPAK-ut.
ma.me
