Partitë opozitare po përgatiten që protesta e paralajmëruar për 9 janar të vitit të ardhshëm të jetë më masivja, me ç’rast, sipas tyre, do të përfundojë edhe qeverisja e Isa Mustafës, njësoj siç i përfundoi pas protestave të këtij fillimviti edhe ish-ministrit për Komunitete dhe Kthim, Aleksandër Jabllanoviç. Më 9 janar 2016, tri partitë opozitare, Lëvizja “Vetëvendosje”, AAK dhe “Nisma për Kosovën”, kanë paralajmëruar organizimin e një proteste gjithëpopullore për të kundërshtuar marrëveshjet me Serbinë për Asociacionin e Komunave me Shumicë Serbe dhe atë për Demarkacionin me Malin e Zi.
Opozitës këto ditë i janë shtuar shpresat se një numër i madh i qytetarëve do t’i përgjigjen ftesës së tyre për të protestuar, të cilët janë të pakënaqur me këtë koalicion qeverisës jo vetëm për shkak të këtyre marrëveshjeve të dëmshme për vendin, por edhe tashmë kur u konfirmua se nuk do të ketë liberalizim të vizave për Kosovën nga Bashkimi Evropian, ndonëse në anën tjetër, Serbia është shpërblyer me fillimin e negociatave me BE-në.
Shefja e grupit parlamentar të “Nisma për Kosovën”, Valdete Bajrami – Dushica, ka thënë për gazetën “Zëri” se mosdhënia e raportit pozitiv nga Këshilli Evropian për liberalizimin e vizave për qytetarët e Kosovës, është edhe një dështim i radhës i diplomacisë kosovare dhe gjithë kabinetit qeveritar.
Në anën tjetër, edhe përfaqësues të shoqërisë civile mendojnë se tanimë janë shtuar arsyet që qytetarët të dalin në rrugë dhe t’i bashkëngjiten opozitës në protestën gjithëpopullore të 9 janarit, kundër kësaj Qeverie të udhëhequr nga Isa Mustafa.
