Opozita: Kosova s’duhet të dialogojë të martën me Serbinë

Rifillimi i dialogut ndërmjet Kosovës dhe Serbisë, pritet të sjellë ndryshim në përbërjet e delegacioneve të të dyja palëve.

Përveç, kryeministrit Isa Mustafa që do të marrë pjesë në takimin që pritet të mbahet të martën në Bruksel, Qeveria e Kosovës ka konfirmuar se pjesë e delegacionit të Prishtinës, do të jetë edhe presidenti i Kosovës, Hashim Thaçi.Këtë e ka konfirmuar zëdhënësi i Qeverisë së Kosovës, Arban Abrashi.

“Kryeministri Mustafa është në koordinim të vazhdueshëm me presidentin Thaçi për pjesëmarrjen në takimet e radhës në Bruksel”, tha Abrashi për Koha.net.

Por, zëvendësministri i Punëve të Jashtme, Valon Murtezaj, nuk ka mundur ta konfirmojë nëse takimi i së martës do të ndodhë apo jo.

“Siç e dini, Mogherini e ka lajmëruar një takim të mundshëm mes kryeministrave, ka pasur konsultime intensive, mirëpo deri në këtë moment, nuk mund ta konfirmoj që takimi të ndodhë apo jo, ky takim ka për qëllim relaksimin e situatës pas tensioneve të javëve dhe muajve të fundit mes të dyja shteteve”, i ka thënë KTV-së Murtezaj.

Kohavisioni ka insistuar të marrë edhe qëndrimin e Presidencës së Kosovës, por kontakti me ta ka qenë i pamundur. Nga ana tjetër, pala serbe nëpërmjet kryeministrit Aleksander Vuçiç konfirmoi se ky takim do të mbahet të martën, ku përkrah tij do të jetë edhe presidenti Tomisllav Nikoliç.

“Të martën në mbrëmje do të vazhdojmë dialogun në Bruksel me Prishtinën, me mbështetjen e përfaqësueses së BE-së Federiga Mogherini. Serbia do të jetë e përfaqësuar në nivel të lartë, ku do të marrë pjesë edhe presidenti i Serbisë Tomisllav Nikoliç, ndërsa unë si kryeministër i Qeverisë.

Mendoj që edhe shqiptarët do t’i sjellin përfaqësuesit e tyre më të lartë të shtetit. Shpresoj se do të ketë mjaftueshëm mirëkuptim që të mos dërgohen më armë në zonat e banuzra me serbë për të treguar muskujt.

Ajo që është më e rëndësishmja për Serbinë është shmangia e konflikteve dhe provokimeve”.Për “Vetëvendosjen”, dialogu me Serbinë nuk ka asnjë arsye të vazhdojë.Ndërsa, AAK-ja konsideron se mbajtja e këtij takimi është miratim i ndalesës së Ramush Haradinajt në Francë.

Pasi u ndalua hyrja e trenit ilegal serb në Kosovë, shefja për politikë të jashtme dhe siguri e Bashkimit Evropian, Federiga Mogherini, si ndërmjetësuese e dialogut, ftoi në një takim krerët e dy qeverive. (b.an)