Dashamir Shehi komentoi në “Euronews Albania” mbledhjen e Asamblesë së PS ku Kryeministri Edi Rama prezantoi kabinetin e ri qeveritar. Dashamir Shehi u shpreh se kemi po të njëjtën qeveri, pasi Rama vazhdon të qëndrojë në krye të saj.
Dashamir Shehi, shprehu edhe një vlerësim për Edi Ramën, duke iu referuar një pjese të fjalimit të kreut të qeverisë ditën e sotme në lidhje me reformën kushtetuese, administrative dhe zgjedhore.
“Një pjesë i njoh, një pjesë nuk i njoh se janë të rinj. Uroj që të rinjtë të bëjnë ndonjë punë por gjykoj se një njeri bëhet ministër për dy cilësi, ose është njeri i rëndësishëm politik, ose duhet të jetë patjetër në fushën e vet specifike, duhet të jetë dikushi.
Qeveria Rama nuk bën asgjë të re. Jemi vend i vogël ku kryeministri ka pushtet absolut. Kemi të njëjtën qeveri, vazhdimi. Gjysma janë po ato, por është vetë ai.
Mbajti një fjalë, ama nëpër ato fjalë që tha, bie dakord dhe unë që të bëhet parlamenti nga 100 veta. I kemi kërkuar ne reformë kushtetuese, reformë administrative, që dhe këtë e përmendi, dhe reformë zgjedhore, sa deputetë do vendosim. Kjo është pozitivja në të gjithë atë që tha sot.”-u shpreh Shehi.
Dashamir Shehi nuk i kurseu kritikat për opozitën të cilën e quajti të korruptuar ndërsa theksoi se është bërë pjesë e marrëveshjeve me qeverinë.
“Opozita nuk është aty ku duhet të jetë. Ky është realiteti. Demokraci hibride, false. Demokraci është që një palë ta kontrollojë tjetrën, jo të korruptohen të dyja palët. Ky këtë punë ka bërë. A kanë bërë marrëveshje para zgjedhjeve.”-deklaroi Shehi.
