Ministrja e Shtetit për Marrëdhëniet me Parlamentin dhe zëdhënësja e qeverisë, Elisa Spiropali tha sot nga foltorja e Kuvendit se rekomandimi pozitiv nga Komisioni Europian për çeljen e negociatave jo vetëm konfirmon rrugën europianiste të qeverisë dhe të Shqipërisë, por njehson më në fund pasqyrimin me fytyrën.
“Ky raport në gjuhën e vet aq të ndryshme nga raportet e tjera konfirmon që tashmë shëmbëllimi ynë para pasqyrës, pra para partnerëve tanë është i njëjtë me fytyrën tonë të vërtetë, me atë çka kemi bërë në vendin tonë”, tha ajo.
Spiropali tha se në raport theksohet me forcë se Shqipëria ka bërë progres të jashtëzakonshëm në Reformën në Drejtësi, se ka ndërmarrë një reformë unike dhe e pakrahasueshme me vendet e tjera të rajonit dhe një model për to.
“Raporti flet edhe për arritjet e Reformës. Mbi 140 prokurorë e gjykatës kanë kaluar në sitën e Vetingut nga të cilët 88 janë larguar nga sistemi ndërsa 53 të tjerë janë konfirmuar në detyrë.
Me rezultatet e arritura, Shqipëria konsiderohet si partner i besueshëm i Bashkimit Europian, jo vetëm si një vend që është në monitorim”, theksoi Spiropali.
Sipas saj, ndryshe nga ajo çka pretendohet natë e ditë me vite të tëra nga opozita ekstraparlamentare, në raportin e progresit theksohet se Shqipëria dhe qeveria ka bërë një tentativë të jashtëzakonshme jo vetëm për të çrrënjosur trafikimin, por edhe kultivimin e kanabisit. Aty flitet edhe për luftën kundër korrupsionit dhe vendosjen e raportit të ri përmes kulturës së zbatimit të ligjit.
“Raporti i progresit është i ndryshëm edhe nga ai i vitit të kaluar. Është një raport i progresit i ri, i thelluar në analizë për të përfshirë të gjitha shqetësimet e ngritura në vitin 2018”, tha ministrja Spiropali.
“Nga pikëpamja politike, raporti ndryshe nga gjuha e mëparshme e ftohtë e Komisionit Europian, ka folur shkoqur. Thuhet në raport se opozita praktikisht ka luajtur një rol destruktiv në avancimin e reformave: dalja nga parlamenti, djegia e mandateve, por edhe dhunë në rrugë. Opozita cilësohet si i vetmi faktor problematik, sabotues në të gjithë projektin tonë europian”, theksoi ajo.
/a.rada
