Opozita ka braktisur Kuvendin në një ditë shumë të rëndësishme, kur votohej rezoluta mbi rekomandimet e KE.
Votat e mazhorancës kanë mjaftuar për të votuar rezolutën mbi gjetjet dhe rekomandimet e raportit të Komisionit Europian për Shqipërinë 2018.
Por duke qenë se deputetët e opozitës kishin lënë më herët sallën e Parlamentit, duheshin edhe votat e aleatëve për të bërë kuorumin e nevojshëm në Kuvendin.
Gjatë votimit të prezencës në seancën e sotme plenare, kanë qenë 74 deputetë, kur 3 prej tyre janë të PDIU-së, 1 deputet i LSI, Robert Bitri, dhe deputeti Tom Doshi.
Kryeministri Edi Rama e ka kritikuar Partinë Demokratike dhe opozitën që u largua nga salla e parlamentit duke mos votuar rezolutën për hapjen e negociatave të BE-së me Shqipërinë.
“Sot është e para herë në historinë e parlamentarizmit demokratik shqiptar që një parti politike braktis sallën kur bëhet fjalë për një rezolutë me interes kombëtar të kësaj natyre. Ja sot kur jemi në metrat e fundit të një rruge shumë të gjatë për të votuar një rezolutë që nuk është e njëanshme, ndodh ajo që s’ka ndodhur kurrë. PD bën atë që s’e ka bërë kurrë as vetë ajo kur ka qenë në opozitë”, tha Rama.
Deputeti i LSI, Robert Bitri nuk i është bindur as këtë të enjte vendimit të grupit parlamentar për të bojkotuar punime te Kuvendit.
Ai ka qëndruar në sallë kur deputetët e PD dhe LSI kanë lënë ulëset, madje edhe ka votuar projektligjet e rendit të ditës si dhe rezolutën për anëtarësimin në BE.
Vota e Bitrit pro rezolutës është e vetmja nga opozita e cila krijoi një precedent duke mosbashkuar votat me maxhorancën për një kauzë kombëtare siç është integrimi në BE.
a.ç
