Në momentin kur foltores së parlamentit po i drejtohej deputeti socialist Rakip Suli, të gjithë deputetët pjesëmarrës të opozitës në seancë janë çuar dhe kanë bllokuar foltoren. Kjo ka sjellë një situatë të tensionuar në seancë, dhe Kryetari kuvendit Ilir Meta është detyruar që të kërkojë 5 minuta pushim.
Pak minuta më parë, në emër të opozitës ka foluir deputeti Eduard Halimi i cili ka akuzuar kryeministrin dhe maxhorancën se kanë bërë një grusht shteti ndaj Gjykatës Kushtetuese, duke mos lejuar çuarjen në këtë institucion të mandateve të Rakip Sulit dhe Valentina Leskajt.
Halimi tha se pa u dorëzuar këta deputetë në Gjykatën Kushtetuese, nuk do të ketë parlament.
“Rrëzimi i kërkesës së Partisë Demokratike për të çuar në Gjykatën Kushtetuese mandatin e dy deptuetëve që kanë abuzuar me fonde publike, është grusht shteti për këtë gjykatë. Një vit më parë ne iu drejtuam Gjykatës edhe për Koço Kokëdhimën. Gjykata nxorri një vend ku thotë se maxhoranca nuk mund të bëhet mburojë, nuk mund ti kthejë deputetët në të paprekshëm. Ky Parlament nuk mund të jetë kurrë i banditëve dhe abuzatorëve. Sot kemi një Parlament që kanë hyrë persona me rekorde të tmerrshme personale dhe rrinë krah për krah me ne. Kemi një Parlament që deputetët marrin fonde publike me leje të kryeministrit dhe Parlamenti refuzon ti çojë para drejtësisë dhe ata rrinë krah për krah me ne. Ndaj dhe në këto kushte opozita dhe gjithë qytetarët janë të vendosur që ky Parlament nuk mund të vazhdojë funksionin e tij”, tha në emër të PD-së, Eduard Halimi.